UEFA CL: Uko amakipe azahura muri 1/4

I Nyon mu Busuwisi niho hamaze kurangira ‘tombola’ uko amakipe azahura muri 1/4  cy’amarushanwa  akunzwe cyane y’amakipe yabaye aya mbere iwayo ku mugabane w’uburayi. Mu mikino ikomeye harimo izahuza Bayern Munich na Manchester United ndetse na Real Madrid izahura na Borussia Dortmund.

Saa saba zuzuye nk’uko byari biteganyijwe, uyu muhango wari utangiye, Louis Figo niwe wakoze igikorwa cyo gukura udupira twanditseho amakipe mu gakangara k’ikirahure twarimo, iruhande rwe hari igikombe aya makipe azaba ahatanira.

Mbere yo gutora, Figo yavuze ko akurikije amakipe umunani ari muri 1/4  abantu bazareba imikino myiza kuko yose agaragaza ubushobozi.

Ikipe yavanywe mbere mu gakangara niyo ibanza kwakira umukino ubanza, ikipe yazamuwe muri aka gakangara mbere ni FC Barcelona hahita hakurikiraho Atletico Madrid ari nayo bizahura.

Imikino ibanza hagati y’aya makipe  izaba tariki 01 n’iya 02 Mata 2014 naho iyo kwishyura ibe ku matariki 08 na 09 Mata 2014.

Umukino wa nyuma w’iki gikombe utegerejwe tariki 24 Gicurasi 2014 kuri Estádio da Luz i Lisbon muri Portugal.

Uko tombola yahuje amakipe:

Barcelona  vs Atlético Madrid
Real Madrid vs Borussia Dortmund
Paris Saint-Germain vs Chelsea
Manchester United vs Bayern Munich

Ikipe ya Paris Saint Germain aha niho kure igeze bwa mbere muri iri rushanwa, Atletico Madrid kure yageze muri iyi mikino ni ku mukino wa nyuma mu1974, naho ikipe ya Borussia Dortmund yo yabashije kwegukana iri rushanwa mu 1997 itsinze Juventus ku mukino wa nyuma.

Izidi zaragitwaye cyane, Barcelona (4), Bayern Munich (5), Real Madrid (9), Manchester United (3) na Chelsea yakegukanye rimwe mu 2012 kuri Penaliti igitwaye Bayern Munich ku mukino waberaga ku kibuga cyayo Allianz Arena.

Paul Nkurunziza
ububiko.umusekehost.com