UEFA CHAMPIONS LIGUE: FC Barcelone vs Bayern Munich muri ½

Muri tombala y’uburyo amakipe yageze muri ½ ry’irushanwa rya UEFA Champions Ligue, azakina, amakipe akomeye yahabwaga amahirwe yo kuba imwe yakwegukana irushanwa yatombolanye.

Ikipe ya Juventus Turin yabashije gusezerera iya AS Monaco yo mu gihugu cy’Ubufaransa, yatomboye Real Madrid, yo yakuyemo muri ¼ mukeba wayo basangiye umujyi, Atletico Madrid.

Umukino uzaba ukomeye cyane, abanshi bemeza ko amakipe ya FC Barcelone na Bayern Munich zahabwaga amahirwe buri imwe yo kuba zahurira ku mukino wa nyuma, zatombolanye muri ½ cy’irushanwa, hari abavuga ko ari umukino wa nyuma ubaye imburagihe.

Barça ikinamo ibihanganjye Leo Messi, Luis Suarez na Dos Santos Neymar Junior bakuyemo byoroshye cyane ikipe ya Paris St Germain yo mu Bufaransa bayinyagiye mu mikino yombi ibitego 5-1.

Bayern Munich na yo itoroshye ahanini kubera umutoza Pep Guardiola uzwiho gukina umukino uryoheye ijisho kandi wihuta cyane, yabashije gusezerera ikipe ya FC Porto yo muri Portugal nubwo mu mukino ubanza yari yamutsinze ibitego 3-1.

Abifashijwemo n’abakinnyi be bakomeye nka Tiago Alcantara, Lucas Muller n’abandi yabashije kwandagaza FC Porto mu mukino wo kwishyura ayitsinda ibitego 6-1.

Pep Guardiola azajya gukina na Barcelona yabereye umukinnyi akanayitoza mu mwaka wa 2008 kugera muri 2012 ayihesha n’ibikombe by’iri rushanwa mu mwaka wa 2009 na 2011.

Uyu mutoza kandi azaba agiye guhura na mugenzi we Luis Enrique bigeze kugirana ibihe byiza bose ari abakinnyi ba FC Barcelone.

Umukino ubanza Juventus izakira Real Madrid CF tariki ya 5 Gicurasi, uwo kwishyura ube ku ya 13 Gicurasi.

FC Barcelona yo izakira FC Bayern Munich ku ya 6 Gicurasi umukino wo kwishyura ube tariki ya 12 Gicurasi.

UM– USEKE.RW