Ubwongereza imbere mu gutanga za Miliyoni kubakinnyi

Kugura abakinnyi bakomeye ni kimwe mu biryoshya Shampiyona.

Mu Bwongereza miliyoni 805,7 z’Ama Euros zasohotse makipe yiyubaka muri iki gihe gishize cyo kugura abakinnyi; izigera kuri miliyoni 485z’amapawundi zasohotse mu makipe 4 ya mbere, bikaba byarazamutseho 33% ugereranyije n’ubushize.

Mu kwezi gushize ku itariki ya 31 mu gicuku ni bwo umuryango w’isoko ry’igura n’igurisha ku mugabane w’i Burayi wari ushyizweho urugi. Iki gihe cyo kugura no kugurisha abakinnyi kitwa marcato estival mu gifaransa, gitangira shampiyona zirangiye i Burayi kikamara hafi amezi ane amakipe arambagira abakinnyi yumvamo ubushobozi.

Uyu mwaka mu Bwongereza nta kabazo k’amikoro ku makipe kari gahari, ibi byatumye amakipe yiva inyuma agura abakinnyi ku buryo budasanzwe, ibi byatumye aca agahigo ko gutanga miliyoni 710 z’amapawundi angana na miliyoni 808,7 mu ma Euros nk’uko bitangazwa n’ibiro bishinzwe kubarura imari i Burayi.

Mu Bwongere uku ni ko amakipe 4 akomeye yikoze ku mufuka ngo azane abakinnyi :

Manchester United yasohoye akayabo ka miliyoni 68 z’ama Euro, Arsenal itaho na miliyoni 69, n’ubwo yaguze abakinnyi isiganwa n’igihe ; Chelsea nayo ntiyazuyaje gutanga amafaranga binyujijwe mu muherwe Roman Abramovic, ikaba yarasohoye ku ikofi miliyoni 78, karundura iza ari Manchester City yavanye mu kigega miliyoni 92 harimo 43 yatanze kuri Sergio Agüero ari na we wahenze cyane uyu mwaka.

Aya mafaranga yatanzwe agera kuri miliyoni 805,7 z’ama Euro ni yo atuma igura n’igurisha ryarazamutseho 33% ugereranyije n’umaka ushize.

Ikindi gihe cyarimo ifaranga rishyushye ni mu mwaka wa 2008 ubwo miliyoni 675 z’amapawundi zatangwaga n’amakipe mu Bwongereza, ari na cyo gihe abaherwe ba Abu Dhabi bayobowe na cheikh Mansour begukanaga Man City.

Mu Bufaransa na ho amakipe yaho yakangukiye kugura abakinnyi arangajwe imbere na Paris Saint Germain.Muri rusange miliyoni 181 z’ama Euro hafi 1/5 cy’ayatanzwe mu Bwongereza ni yo mafaranga yatanzwe n’amakipe yo mu Bufaransa. Ibi byatumye isoko ry’igura n’igurisha rizamukaho 35% muri iki gihugu, PSG ikaba yararekuye miliyoni 85 muri ziriya twavuze ruguru nk’uko bitangazwa n’ishyirahamwe ry’abakinnyi ba bigize umwuga (LFP).

Gusa nkuko twavuze ko muri mercato amakipe aba yiyubaka, amwe yatangiye kwerekana umusaruro nko mu Bwongereza, Man City n’ibikurankota byayo ikabayaranyagiye Tottenham 5-1 iyisanze iwayo, muri Esipanye Barcelona nayo yabikoze Villarreal iyitsinda 5-0, na Real Madrid ubwo yatsindaga Zaragoza 6-1 utibagiwe Manchester yakubitiye Arsenal ahareba i Nzega ibitego 8-2 ; bamwe bakavugako umupira utangiye kwangirika kubera gukinwa n’amakipe atanganya ubushobozi.

Iki bazo cy’umunsi : Wowe nk’umufana uravuga iki ku buryo amakipe yiyubatse ?

HATANGIMANA Ange Eric
UM– USEKE.COM