Ubuyobozi nibusesengure akarengane bive mu nyandiko gusa – Gashumba

Muhanga – Abayobozi ku rwego rw’uturere cyane cyane inama ngishwanama zasabwe kuva muri za raporo gusa zo mu nyandiko zikamanuka mu baturage gukurikirana izo raporo ku karengane ziba zabagejejweho.

Byasabwe na Pauline Gashumba umuyobozi ushinzwe gukumira no kurwanya ruswa n’ibyaha bijyanye nayo ku rwego rw’Umuvunyi mu gihugu ubwo yagiranaga inama n’abo bayobozi mu karere ka Muhanga kuri uyu wa 22 Gicurasi 2013.

Muri iyi nama abayobozi babanje kwibukiranya ku bubi bwa ruswa n’akarengane bituma abaturage badahabwa ibibagenewe bakagura uburenganzira bwabo ibi ngo bigasubiza inyuma itangwa rya servisi zinoze ndetse bikadindiza amajyambere.

Pauline Gashumba avuga ko amategeko ateganya ko inama ngishwanama ku rwego rw’Akarere arirwo rugomba gusesengura raporo zitangwa ku bijyana na ruswa n’akarengane kugirango bazisesengure maze bafate umwanzuro.

Yagize ati:  “ntimukabone ibintu mu nyandiko ngo mwumve ko ari inyandiko gusa ahubwo mukurikirane mushake umwanzuro w’ibiba bikubiye cyangwa byihishe inyuma  muriyo”.

Yavuze ko bimwe mu bitangazwa mu makuru nabyo bishobora kuba byabafasha mu kumenya ahavugwa akarengane na ruswa kugirango bibashe gukumirwa cyangwa kurwanywa.

Ati: “Ibyandikwa mu binyamakuru nabyo bishakirwe umuti kuko niba banditse ngo gitifu runaka yakubise umuturage bikurikiranwe, barebe imvo yabyo kuko bishobora kuba ari akarengane”.

Abanyamabanga nshingwabikorwa b’imirenge yo mu karere ka Muhanga bari muri iyi nama babajije niba bazajya bafata n’ibihano ku bagaragayeho ruswa, Gashumba abasubiza ko bo batemerewe gufatira ibihano abantu ko ahubwo batanga raporo ku bashinzwe kubikurikirana.

Buri gihembwe inama ngishwanama yo kurwanya ruswa n’akarengane isabwa gutanga raporo ku nama ngishwanama ku rwego rw’Umuvunyi.

MUHIZI Elisée
UM– USEKE.RW