UBUSHAKASHATSI: Babona bate uruhare rwabo mu buyobozi, amashyaka na Sosiyete civile?

*Kuri bamwe ngo babona imyanzuro iva hejuru ikabisukaho ngo babyemeze
*Amashyaka ngo ni ayo guha abayashinze imyanya mu butegetsi,
*Ishyaka FPR ngo babona ari ryo rikora gusa,
*Societe Civil ngo bibaza icyo ari cyo

Kuri uyu wa gatatu tariki 24 Kanama, Umuryango Never Again Rwanda ushinzwe kubaka amahoro no guharanira ko Jenoside itabaho ukundi, watangaje ubushakashatsi bwerekana uko abaturage bumva uruhare rwabo mu miyoborere mu Rwanda. Abaturage ngo babona imyanzuro imwe ibaturwaho, bakobana ko amashyaka agaragara mu gihe cy’amatora, n’aho ngo imiryango itari iya Leta imyinshi ngo ntibazi ibyo ikora.

Bamwe mu bagize uruhare muri ubu bushakashatsi nka Intareyamahanga Reverien na Odeth Kantengwa banabusobanuye, bavuze ko bwakorewe mu turere 10 mu Ntara n’Umujyi wa Kigali, bukorerwa ku bantu 616.

Ubu bushakshatsi ntabwo ari ubugaragaza imibare (Quantitative Research) ahubwo ni ubwo guha abantu umwanya bakavuga ibitekerezo byabo (Qualitative).

Never Again Rwanda isobanura ko yakoze ubu bushakashatsi igamije kureba uko imiyoborere myiza Leta y’u Rwanda yashyizeho nyuma ya Jenoside yakorewe Abatutsi abaturage bayigiramo uruhare, kuko ngo bemera ko imiyoborere myiza ari umusingi w’iterambere.

Ubushakashatsi rero ngo bwari bugamije kureba uko abaturage bakomerekejwe na Jenoside, ubu noneho bagira uruhare mu miyoborere, no kureba ubusesenguzi bwabo n’uruhare bagira mu gutanga ibitekerezo ku bibazo biriho.

Abaturage ngo bagaragaje ko uruhare mu miyoborere bumva ko ari ugushyiraho no kubaza abayobozi inshingano, no gusaba inama abayobozi bishyiriyeho. Gusa, ngo kugira ngo ibyo bibeho ni uko hagati y’umuyobozi n’umuturage haba hari ikizere, amakuru, no kuba umuntu atagirwaho ingaruka no kuvuga ikintu runaka.

Mu bitekerezo bya bamwe mu baturage bumvikana muri video yafashwe mu bushakashatsi, abaturage bagaragaza ko uruhare rwabo mu bibakorerwa ari ruke, bakabona ko amashyaka aboneka mu gihe cy’amatora, imiryango itari iya Leta yo ngo ntabwo ikora.

Umuturage wo muri Rutare i Byumba wakoreshejwe muri iyo video, ati “Ndi mukuru, njya mu nama nyinshi ariko sindabona aho abajyanama haba mu kagari, ku murenge  no mu karere baza ngo batubaze ibitekerezo, nyoberwa n’ibyo biga aho biva.”

Undi muturage ndetse akaba n’Umujyanama mu karere, yavuze ko imyanzuro biga iba yateguwe n’abakozi b’akarere akibaza niba we nk’umujyanama nta ruhare aba yagize, aho uruhare rw’umuturage rwava.

Ati “Abayobozi bo hejuru bazana imyanzuro ngo mwemeze birihutirwa,…”

Umuturage w’i Rwamagana we yavuze ko mu gihe habaye inama y’Umurenge usanga bafungishije amaduka yose, akemeza ko nta ruhare umuturage aba yabigizemo.

Ati “Inama iraba ubuzima bugahagarara, amaduka yose ugasanga bayafunze abantu bakabura aho bahahira, nta buryo byakorwa inama ikaba n’ubuzima bugakomeza?”

Undi muturage yavuze ko iwabo i Gicumbi, ubuyobozi bushyigikiwe na Mayor Nyangezi (yahoze ari umuyobozi wa Gicumbi) batemaguye insina z’abaturage n’imibyare (insina nto) ifite akamaro bagashyira hasi, ati byaduteje inzara tuyita “Rwanyangezi”.

Hon Fred Kayiranga nawe wabajijwe muri ubu bushakashatsi asa n’uwemerenya n’abatuarege ko hari ibyemezo bifatwa batabiganirijwe, aho avuga ko basuye ahantu bagasanga nk’umuhanda wubatswe n’amafaranga menshi utakibasha gukora kubera ko wubatswe ahadakwiye, wabaza abayobozi bati ayo niyo mafaranga Leta yaduhaye.

Ati “Hari abayobozi bo hasi bataramenya guhitamo ikibafitiye akamaro.”

Amashyaka afasha abayashinze kwibonera imyanya ya politiki

Abaturage bavuga ko amashyaka batajya babona ibikorwa byayo kimwe n’imiryango itari iya Leta, bakibaza niba abaho cyangwa habaho ishyaka rimwe rya FPR.

Umuturage muri ubu bushakashatsi ati “Amashyaka ni uburyo bwo kugira ngo beneyo bibonere imyanya muri politiki. Ushobora gusanga umuntu ari Minisitiri afite ishyaka ariko riri mu kirere atarigeze yumva ibitekerezo by’abayoboke be.

Amashyaka ariho ariko ntakora. Nabwirwa n’iki se amashyaka akora kandi nta bikorwa mbona? Mbona amabendera ngeze kuri forum y’amashyaka ariko ntiwambaza ngo iri shyaka rikorera aha. Mbona ishyaka ari rimwe gusa, FPR niyo mbona ikora.”

Undi muturage yavuze ko amashyaka abatera ubwoba mu gihe cy’amatora ugasanga barahangayitse ariko yarangira bikaba birarangiye ntibazongere kubona beneyo.

Dr Frank Habineza wa Green Party abivugaho iki?

Uyu muyobozi w’ishyaka avuga ko ishyaka ryabo ari rishya rimaze imyaka itatu bakaba bamaze gushinga inzego z’ubuyobozi mu turere 15 ku rwego rw’Akarere ariko ngo mu mwaka utaha mu kwezi kwa Kamena bafite gahunda yo kuba bageze mu turere 25.

Iri shyaka ngo rifite n’abahuzabikorwa barihagarariye mu rwego rw’uturere n’imirenge ariko batatowe ahubwo bagiye bashyirwaho (nomination).

Ati “Icyo twifuza ni uko mu nzego zose hajyaho abantu batowe n’abaturage.”

Ku kibazo cy’uko amashyaka agamije imyanya y’ubutegetsi adakora, Dr Habineza Frank avuga ko amashyaka icyenda atavuga rumwe na FPR iri ku butegetsi mu Rwanda, asa n’ayemeye kugenda mu murongo umwe w’imitekerereze no guhuza ibikorwa (coalition) ngo ibyo bituma ibikorwa byayo nk’uko abaturage babivuga bitagaragara hakaboneka FPR.

Ati “Ishyaka ryacu rya Green Party ntabwo turi muri Guverinoma, ntabwo turi no mu Nteko, turakora, no mu turere turiyo, ibikorwa byacu biragaragara, n’andi mashyaka arakora kuko akorera muri Guverinoma afite ukuntu akora.”

Umunyamabanga Uhoraho muri Ministeri y’Ubutegetsi bw’Igihugu, Vincent Munyeshyaka yavuze ko abaturage bagaragaje ko batagira uruhare mu igenamigambi ry’ibikorwa no gusuzuma ibyakozeho kandi ngo kugira ngo bigerweho ntibyakorwa mu mwaka umwe ngo birangire.

Yavuze ko Minisiteri y’Ubutegesti bw’Igihugu yasabye ko buri wa gatatu inzego zose z’ibanze zahura n’abaturage kugira ngo bakemure ibibazo byabo.

Ku kibazo cy’uko inama zihagarika ubuzima ati “Icyo umuturage yavuze turacyemera, higeze kubaho igihe cy’imikorere mibi cyane mu mujyi inama yaba ubuzima bugahagarara, twasabye ko abayobozi bakora igenamigambi rinoze, inama zigategurirwa ku gihe, abaturage bakamenyeshwa amasaha bakenewemo, ariko zigakorwa ku buryo n’ibikorwa bisanzwe by’abaturage babigeraho.”

Mu giturage ngo inama zose basabye ko zikorwa abatuareg bavuye mu mirimo yabo, keretse inama zimwe na zimwe za ngombwa.

Ku gitutu gishyirwa ku bayobozi, Umunyamabanga Uhoraho muri Minisiteri y’Ubutegesti bw’igihugu avuga ko kizahoraho mu gihugu nk’u Rwanda gitera imbere, kandi ngo nk’umuyobozi ni we ugomba gushyira ku murongo ikihutirwa, iki gitutu kandi ngo ntabwo gishobora kuba intandaro yo “Gutekinika” nk’uko abaturage babigaragaje.

Munyeshyaka ati “Igihe cya tekinike cyabayeho ariko ubu ngubu birimo gukemuka, kandi ntabwo umuntu atekinika kubera ko yabuze igihe. Burya gutekinika bijyanye n’indangagaciro, wowe nk’umuntu nimba wumva ikintu atari cyo, ntabwo wakigira cyo kubera ko igihe kirukanka.”

Yavuze ko abayobozi barimo kubegera bakabigisha indangagaciro z’ubunyangamugayo no kubahiriza igihe no kuvuga ukuri ku buryo ibyo bakora byose babikora mu kuri.

HATANGIMANA Ange Eric
UM– USEKE.RW