Ubujura mu modoka buri gufata indi ntera

Cyane cyane mu mujyi wa Kigali niho abatwara imodoka bwite usanga bavuga ko ubu bujura buri kugenda bufata indi ntera kuko bwavuye mu bice by’umujyi bukajya cyane muri za ‘quartiers’ aho imodoka zitaha cyangwa abazitwaye bajya ku mpamvu zitandukanye.

Nyamirambo, Kimirinko na Gikondo niho havugwa cyane ubu bujura bukorerwa imodoka ziparitse ku muhanda cyangwa mu ngo. Mu cyumweru gishize Umuseke wamenye abibwe bagera ku munani mu buryo busa.

Agiye gusura inshuti i Gikondo, Callixte Tugirimana mu cyumweru gishize yibwe radio y’imodoka, ‘boite de control’ izamura ibirahure by’imodoka ye yo mu bwoko bwa Toyota Carina E.

Kuwa gatatu w’icyumweru gishize kandi uwitwa Angelique Mugeni i Nyamirambo mu Kivugiza imodoka ye ya Toyota Avensis nayo yibwe system yose ya Radio, boite de control izamura ibirahure ndetse n’ibirahure byerekana inyuma (Rétroviseurs).

Kuwa kane w’icyo cyumweru uwitwa Francois Kabera nawe imodoka ye ya Toyota Rav4 yibwe Radio n’utundi tuntu basanze imbere mu modoka ye, ibi yabyibiwe ku Kimironko hafi y’ahitwa ku Isangano.

Mu mpera z’icyumweru cyabanjirije igishize umunyamakuru w’Umuseke Jean Damascene Ntihinyuzwa nawe wari mu bice bya Kimironko yibwe mu modoka ibikoresho by’akazi birimo mudasobwa igendanwa yo mu bwoko bwa HP y’umweru na Camera yo mu bwoko bwa Canon EOS REBEL T3i byibiwe mu modoka yafunguwe n’abajura.

Iyi mudasobwa ikaba iri gushakishwa kuko irimo ibigendanye n’akazi ke ndetse byagaragarira uwayigura wese ko yari iy’umunyamakuru w’Umuseke kubera inkuru n’amafoto agaragara ukiyifungura.

Mu mudugudu wa Karama Akagari ka Nyakabanda  Umurenge wa Niboye mu karere ka Kicukiro ingo eshatu zituranye umwe mu bazituyemo yabwiye Umuseke ko izi ngo ziherutse kwibwa n’abajura binjiye nijoro bakamena imodoka basanze ziparitse mu rugo bakazinjiramo bakaziba bimwe mu bikoresho byazo.

Mu ntangiriro z’iki cyumweru turimo i Nyamirambo mu bice bya Rwezamenyo naho humvikanye ubujura bwo mu modoka aho abajura bafunguye imodoka ya Carina E bakiba ibyari biyirimo birimo Radio, Telephone igendanwa n’icyuma kizamura ibirahure by’imodoka.

Aba bajura ngo ntabwo bakiba imodoka ziparitse mu bice by’umujyi imbere y’inyubako kuko hari abashinzwe kuzirinda babihemberwa, ubu ngo bimuriye ibikorwa byabo bibi muri za ‘quartiers’ aho mu kanya gato baba bamaze gufungura imodoka bakayiba.

Iyo hatabayeho uburangare bwa ba nyiri amamodoka bashobora kuzisiga zifunguye cyangwa se zidafite intabaza, aba bajura bivugwa ko bagira uburyo bwihariye bafungura imodoka bakaziba.

Police y’u Rwanda ikurikirana kenshi ubujura nk’ubu, mu mpera z’ukwezi gushize hafashwe abajura biba imodoka mu bice bya Remera banafatanwa imfunguzo ebyiri bakoresha banerekana umwe mu bantu babagurira ibyo bibye.

Gusa abibwa bavuga ko ubu bujura bumaze kuzamura umurindi.

Abibwe basabwa kugeza ikirego kuri Police kugira ngo ikurikirane ibyo bibwe. Ndetse Police igasaba ba nyiri amamodoka kuba maso no kwitwararika bene abo bajura.

Ibyibwe byo akenshi ngo bishakirwa ku ‘masoko’ y’ibikoresho bya ‘occasion’ by’imodoka i Nyamirambo,   Gatsata na Kicukiro Centre hirya gato y’isoko aho abajura bagurishiriza za telefoni kuri ‘make’ .

UM– USEKE.RW