Ubudage bwijeje u Rwanda kongera ishoramari no kugira uruhare mu kurandura FDLR

Mu ruzinduko Minisitiri w’Ububanyi n’Amahanga w’igihugu cy’Ubudage Frank-Walter Steinmeier yagiriye mu Rwanda aho yakiriwe na mugenzi we w’u Rwanda Louise Mushikiwabo, ndetse anagirana ikiganiro n’abanyamakuru aho batangaje ko mu biganiro bagiranye harimo gahunda yo kuzamura ubukungu ndetse n’ikibazo cy’umutwe wa FDLR.

Mu kiganiro n’abanyamakuru Minisitiri Louise Mushikiwabo yavuze ko u Rwanda rufitanye ubushuti n’igihugu cy’Ubudage, bityo ngo mu biganiro baraye bagiranye nimugoroba na Minisitiri w’Ubudage baganiriye ku bufatanye hagati y’u Rwanda n’Ubudage, kuko Rwanda rugomba kwagura no gusigasira ubufatanye buri hagati ya rwo n’Ubudage mu karere, muri Afurika yo hagati ndetse no muri Afurika y’Uburasirazuba u Rwanda rubarizwamo.

Min. Mushikiwabo yavuze Ubudage bwiyemeje gushora imari mu Rwanda mu burezi, ubuzima, mu miturire myiza, ndetse no mu kwemerera abaturage bakajya gutemberera mu bihugu byo hanze ku isi bakajya gushaka ubumenyi, ubwo bukaba aribwo buryo (Strategy) u Rwanda rukoresha.

U Rwanda ariko ngo rwasabye Ubudage ko bwagaragara cyane ku mugabane wa Afurika kandi ntibibe ku Rwanda gusa ahubwo bugakorana n’Afurika yose.

Min Mushikiwabo ati “Ubudage bugira uruhare rwiza ku mugabane w’Uburayi gusa, icyo dushaka kuvuga cyane n’ubwiza bw’umubano (Quality of Relationship), kuko irakenewe mu kuvugwa hagati ya Afurika n’Uburayi muri rusange kuko muri Afurika Ubudage burahari ariko ntabwo bihagije.”

Min. Mushikiwabo yakomeje avuga ko banaganiriye ku byerekeye umutekano n’umutuzo mu karere u Rwanda rubarizwamo. Bimwe mu byo baganiriye harimo kureba uburyo isi yarushaho gutekana, aho abayituye bashobora kubahana hagati yabo, kandi bakita ku byifuzo bya bagenzi babo.

Min. Mushikiwabo avuga ko kuba Ubudage bwagaragara muri politiki ya Afurika atari ikintu kibi, kuko igihe cyose iyo bari kureba ku kibazo cy’umutekano ku mugabane wa Afurika muri rusange, usanga hagaragara ibihugu nk’Ubufaransa, Ubwongereza n’Ububiligi kandi ngo Ubudage ari igihugu gikomeye.

Ikibazo cya FDLR ikidegembya mu Burasirazuba bwa Congo Kinshasa

Min. Mushikiwabo yavuze ko ubutumwa (Mission) bwose bugira itangiriro n’iherezo, ari nay o mpamvu ngo hategerejwe umusaruro w’ingabo za MUNUSCO mu gihugu cya Congo nyuma y’imyaka isaga 15 zihamaze zigarura umutuzo, gusa u Rwanda rutegereje ko izi ngabo za UN zizarandura umutwe w’inyeshyamba za FDLR zishinjwa n’u Rwanda kuba zarasize zikoze Jenoside ndetse zikaba zarashyizwe ku rutonde rw’imitwe y’iterabwoba na Amerika.

Yagize ati “Kuba Munusco iri muri Congo turashaka kureba ibizavamo. FDLR irasakaza uburozi bwayo bw’ivangura ry’amoko yaba muri congo ndetse no mu karere, birakenewe ko yavanwaho.”

Min Mushikiwabo yavuze ko ikibazo cya FDLR kigomba gushakirwa umuti n’ibihugu by’akarere kuko ngo byose birebwa n’ikibazo aho kuba Congo Kinshasa gusa. Yavuze ko hakenewe imbaraga za gisirikare kugira ngo FDLR ikurweho.

Min Mushikiwabo yavuze ko ingabo z’u Rwanda ziteguye kurinda umutekano w’igihugu ati “Twebwe nk’u Rwanda icyo twakora ni uko abasirikare bacu bakwitegura guhashya umuntu wese wavogera umupaka wacu, turabizi icyakorwa kugira ngo turinde umutekano w’abaturage bacu.”

Minisitiri w’Ububanyi n’Amahanga w’Ubudage Frank-Walter Steinmeier yavuze ko Munusco yarwanyije M23 birashoboka, ariko kuri FDLR ngo umukino wa politiki uri gutuma Monusco idahashya FDLR kubera inyungu.

Yagize ati “Ntiturabona Munusco irwanya FDLR, ariko twaganiriye na Monusco ejo wenda hari icyakoreka. Ubudage nubwo butari mu nama ishinzwe umutekano mu Muryango w’Abibumbye ariko bwagira uruhare ku bijyanye n’umutekano w’aka karere.”

Min. Frank-Walter Steinmeier yijeje ko Ubudage buzakomeza gukorana n’u Rwanda ndetse avuga ko mu Rwanda ari ahantu heza ho gukorera ubucuruzi, kuko ifaranga ry’u Rwanda ridahungabana ngo rite agaciro cyane, kandi ngo hari politiki yo korohereza ishoramari.

Yavuze ko barimo barakangurira abashoramari babo kuza gushora imari yabo mu Rwanda, ngo hari amakuru meza bazakomeza kubabwira, ku buryo Ubudage bugomba kugaragaza uruhare cyane mu karere ndetse no muri Afurika muri rusange.

Daddy SADIKI RUBANGURA
UM– USEKE.RW