U17:Abascouts ba Fenerbache bashimye bamwe mu bakinnyi b’u RWanda

Nyuma yo guhabwa amahugurwa kubijyanye no kureba abakinnyi bato bafite impano muri ruhago (Scouting System) aba Scouts boherejwe n’ikipe ya Fenerbache yo muri Turkiya bavuga ko bashimye cyane bamwe mu basore b’amavubi U17 muri gikombe cy’isi U17, U Rwanda rukaba rwaraye rusezerewe hamwe na Canada.

Erdem Güler umwe mu bascouts 3 boherejwe na Fenerbache yatangarije umuseke.com ko aho bari muri Mexico bagiye mu mijyi 5 muri 7 yakiniwemo igikombe cy’isi, yemeza ko I Pachuca ahakinirwaga itsinda C ririmo u Rwanda bahabonye bamwe mu bakinnyi beza cyane.

Yadutangarije ko nyuma yo kuva mu mijyi ya Morelia (Group A) na  Guadalajara (Group F) na Queretaro(Group F ) barambagiza abakinnyi, basoreje mu mijyi ya Pachuca (ahakiniraga Group C irimo u Rwanda), avuga ko bagiye muri iyi mijyi kuko yegeranye kandi byabafashaga kureba imikino hafi ya yose, Pachuca na Queretaro bakaba barahasanze abakinnyi beza.

Kuri facebook chat ati: “In the two cities, there was amazing players from Rwanda and Uruguay”  “Muri iriya mijyi ibiri (Pachuca na Queretaro), twabonye yo abakinnyi beza mw’ikipe y’u Rwanda na Uruguay”

Erdem Güler wari kumwe na bagenzi be Alper Yaşar, Fatih Koçyiğit boherejwe na Fenerbache kureba impano zaje gukina igikombe cy’isi, twagerageje kumubaza bamwe mu basore baba barashimye mu Mavubi U17, atubwira ko atari byiza kuvuga amazina yabo bose, ariko ati: “uwitwa Michel (Rusheshangoga), Juan Cruz (Mascia, rutahizamu wa Uruguay), Guillermo (Mendez, ukina hagati muri Uruguay), Eric (Nsabimana), Robert (Ndatimana) ayo ni amwe mu mazina mpita nibuka bari muri carnet yanjye, buri mu scout hano numva abazi”

Uyu mu scout wa Fenerbache avuga ko nyuma yo kubona umukinnyi bahita bamushakaho amakuru, mbere yo kugira icyo banamubaza, bamwe mu bakinnyi nka Bonfils (Kabanda) ngo bamenyeko afite amasezerano na FC Nancy, naho Agustin (Tabarez) myugariro wa Uruguay we ngo akaba yaramaze kumvikana na Manchester City biciye muri se umubyara ari nawe umubereye manager.

Abakinnyi b’Amavubi U17 igizwe n’abasore ahanini bo muri Academy ya FERWAFA na SEC Academy. Abo muri Academy ya FERWAFA bakaba amasezerano yabo y’imyaka 3 azarangira mu kwezi kwa 12 uyu mwaka, nibwo baba bashobora kwivuganira n’ikipe ibashaka, cyangwa bakavugana n’ababahagarariye, naho ubu uwabashaka wese yabanza guca kuri FERWAFA yabirereye.

Gahunda yaba ihari nkuko tubikesha bamwe mu bari kumwe n’iyi kipe muri Mexico (izataha kuri uyu wa mbere cyangwa kuwa kabiri) n’uko aba bana bazaguma hamwe nk’ikipe, ndetse ngo FERWAFA yaba igiye kongera gutegura ishakisha (Selection) ry’abandi bana bazabasimbura muri Academy ya FERWAFA.

Erdem Güler na bagenzi be bakaba barakoze amahugurwa ya “Scouting System Revolution with SportsCode” batoranyijwe muri za Kaminuza zitandukanye muri Turkiya, ubu bakaba barabaye aba Scouts b’iyi kipe. Aya mahugurwa bayahawe na Tarkan Batgun impuguke mu kureba abana babakinnyi bakiri bato ku mugabane w’uburayi n’africa.

Jean Paul Gashumba

Umuseke.com