U Rwanda rwohereje abapolisi kubahiriza umutekano n’amahoro muri Centrafrica

Kuri uyu wa mbere tariki ya 1 Nzeli, Polisi y’u Rwanda yohereje itsinda ry’Abapolisi 140 barimo ab’igitsinagore 14 mu gihugu cya Centrafrica mu rwego rwo gufasha abaturage baho kugarura umutekano n’amahoro muri icyo gihugu, aba bapolisi bagiye mu butumwa bw’amahoro bw’umuryango w’abibumbye muri Centrafrica (MINUSCA) buzamara igihe kingana n’umwaka umwe.

Chief Superintendent of Police (CSP) Benoit Kayijuka, uyoboye iri tsinda yavuze ko aba bapolisi bazakorera imirimo yabo mu murwa mukuru Bangui, bakazaba bashinzwe gucunga umutekano mu murwa mukuru, kubahiriza umutekano w’abayobozi bakuru b’igihugu no gucunga umutekano w’inyubako n’ibindi bikorwa remezo.

U Rwanda rubaye igihugu cya mbere cyohereje abapolisi kubungabunga umutekano n’amahoro muri Centrafrica kimaze iminsi cyarashegeshwe n’intambara.

Mu ijambo yagejeje kuri abo bapolisi ku cyumweru tariki ya 31 Kanama, umuyobozi mukuru wa Polisi y’u Rwanda IGP Emmanuel K. Gasana yabasabye kuzita ku kazi kabajyanye, kuba ba Ambasaderi beza b’igihugu cyabo ndetse no gukomeza kugaragaza neza ibendera ry’igihugu ry’u Rwanda barangwa n’ikinyabupfura, ubunyamwuga n’indangagaciro za Kinyarwanda.

IGP Gasana yagize ati “U Rwanda rwariyubatse nyuma y’amateka mabi rwanyuzemo, niyo mpamvu duhora dushaka gufasha ibindi bihugu bishobora kuba byahura n’ibibazo twahuye nabyo.”

IGP Gasana kandi yabasabye gukoresha ubunararibonye abapolisi b’u Rwanda bafite bakagarura amahoro muri Centrafrica, ndetse abasaba gukorana bya hafi n’abandi baturutse mu bindi bihugu bari kubahiriza amahoro muri icyo gihugu bakagira ibyo babigiraho.

Kugeza ubu u Rwanda rufite abapolisi 528 mu butumwa bwo kubungabunga umutekano n’amahoro by’umuryango w’abibumbye mu bihugu bitandukanye byo ku Isi.

Source: RNP

UM– USEKE.RW