Tuyisenge, umunyeshuri udasanzwe wirihira ishuri abikesha ubuvumvu bwe

Ni umunyeshuri wiga mu mwaka wa gatanu w’Imibare, Ubutabire n’ibinyabuzima mu ishuri ryisumbuye rya ESAPAG Gitwe ribarizwa mu karere ka Ruhango, umurenge wa Bweramana, uyu munyeshuri ntasanzwe kuko niwe ku giti cye wirihira ikiguzi cy’uburezi  abikuye ku murimo we w’ubuvumvu.

Tuyisenge J. Pierre w’imyaka 20 gusa y’mavuko akomoka mu karere ka Karongi, umurenge wa Murambi, akagari ka Nyarunyinya, yatangiye uyu murimo we yiga mu mwaka wa kabiri ku ishuri ryisumbuye rya IPK Kirinda, buhoro buhoro nibwo yaje kubyaza ubuvumvu mo ubushobozi bwo kumwishyurira ishuri hamwe n’ibikoresho byose by’ishuri akenera akabyigurira.

Ubwo yaramaze kurangiza icyiciro rusange cy’amashuri yisumbuye yakomeje amasomo ye kuri ESAPAG Gitwe ari naho yiga kugeza ubu, Jean Pierre atangaza kuva icyo gihe cyose nta faranga ababyeyi be bamutangaho mu kumufasha kwiga. Yaba ibikoresho by’ishuri, urugendo, minerval cyangwa ikindi byose arabyibashiriza.

Mu buzima ngo yakuze yifuza kutaruhanya no kurushya ababyeyi ati” Mu rugo mfite barumuna banjye babiri nabo bari mu ishuri ubwo rero ntabwo nshobora kwirirwa ndushya ababyeyi banjye ngo mbasabe amafaranga y’ishuri, nakuze numva ngomba kwikorera buri kimwe.

Nashimishijwe cyane n’uko barumuna banjye batsindiye kujya muri secondaire maze ku giti cyanjye nsaba mu rugo ko jyewe bandeka bakita kuri barumuna banjye, umurimo wanjye wo korora inzuki ukandwanaho mu masomo yanjye, niko byagenze na n’uyu munsi Imana yaramfashije nduhura ababyeyi banjye ”.

Imizinga isaga 100 uyu musore afite iri iwabo I Karongi yabashije kumugeza kuri byinshi mu buzima bwe, usibye kwirihirira ishuri harimo kuba afite ihene zirindwi mu rugo iwabo, afite n’ikimasa gikuru yaguze mu mafaranga yakuye muri aka kazi ke.

Nyuma y’amasomo aha yigai Gitwe afata ubuki baba bamwoherereje bw’umusaruro w’inzuki ze akabucuruza n’abantu baba barabumusabye. Mu kiruhuko aba afite akazi kenshi ko kwita ku nzuki ze no gucuruza umusaruro wazo ashaka amafaranga azamufasha ku ishuri.

Nkuko Tuyisenge yatangarije UM– USEKE, avuga ko ubwo umwaka utaha azaba arangije amashuri ye yisumbuye nta gushidikanya niyo atabona buruse azahita yirihira na Kaminuza kuko ahamya ko uyu murimo azawuteza imbere ku buryo uzavamo amafranga yo kuriha muri Kaminuza.

Jean Pierre yemeza ko umurimo we umutera ishema mu bandi ati:”abajeune usanga bapinga imirimo, ariko umurimo n’ugutunze, nishimira kuba ndi umuvumvu nkiri na muto, nifuza ko bagenzi banjye bajya bashakisha ubuzima bihangira imirimo kuko aribyo bizabateza imbere n’igihugu cyacu”.

Urayeneza Gerard umuyobozi w’ishuri ryisumbuye rya ESAPAG Gitwe, yatangarije Umuseke ko kuba umunyeshuri nk’uyu afata icyemezo n’umugambi mwiza wo guhanga umurimo ari intambwe uburezi bw’u Rwanda bumaze gutera.

Urayeneza avuga ko uyu munyeshuri bafite ari intangarugero ku bandi.

Tuyisenge, umurimo we wo korora inzuki awufatanya n’amasomo kandi ntibyice amasomo ye kuko k’urupapuro rw’amanota rw’igihembwe gishize, rugaragaza ko uyu munyeshuri yitwara neza mu masomo ye.

Inzozi ze ngo ni ukugera ku ruganda rutunganya ubuki. Ati “nubwo narangiza Kaminuza sinshobora kuzareka ubuvumvu ahubwo nzareba uko nabuvugurura nkabukora ku buryo buteye imbere”

Photos/Damyxon

Jean Damascene NTIHINYUZWA
UM– USEKE.RW