Turatsinze na Mugabo birukanywe na Police FC, baba bumvikanye na Rayon

Police FC yirukanye abakinnyi batatu barimo ba myugariro babiri, Hertier Turatsinze na Mugabo Gabriel. Aba basore bivugwa ko bari mu biganiro na Rayon sports ifite ikibazo mu bwugarizi.

Tariki 21 Ukwakira 2016 nibwo Police FC yahagaritse by’agateganyo abakinnyi batatu; rutahizamu Muganza Isaac naba myugariro Hertier Turatsinze na Mugabo Gabriel. Aba basore bashinjwe imyitwarire mibi no kwangisha bagenzi babo umutoza.

Umutoza Seninga Innocent bivugwa ko yabwiye ubuyobozi bwa Police FC ko atifuza kongera gukorana n’aba bakinnyi, byatumye mu ijoro ryo kuri uyu wa mbere birukanwa burundu.

Mugabo Gabriel yabwiye Umuseke ko bemerewe kumvikana n’andi makipe.

“Hari amakipe atandukanye turi kumvikana, hari imwe ikomeye ndi guha amahirwe, ariko sinayitangaza. Bitarenze icyumweru gitaha tuzaba twabitangaje. Mvuye muri Police FC mu buryo butari bwiza ndashaka ikipe ikomeye impa umwanya nkagaragaza ko ntari umukozi mubi.” Mugabo

Biravugwa ko Rayon Sports ariyo kipe ikomeye yakomeje kuvuga kandi ishobora kumusinyisha we na mugenzi we Hertier Turatsinze.

Mu mpera z’icyumweru gishize uyu mutoza wa Rayon sports yabwiye abanyamakuru ko yasabye abayobozi be gusinyisha ba myugariro. Mu magambo ye yagize ati:

“Komite irabibona kuko iyo utakaje abakinnyi bane kandi bakina ahantu hamwe biba byiza gushaka abasimbura. Ubu dusigaranye ba myugariro babiri nta mpinduka wakora urabyihanganira ugakosora ugategereza wawundi ko akira. Gusa na bo barabizi birakwiye ko tugura ba myugariro”

Ni nyuma yo kubura Abdoul Rwatubyaye basinyishije agenda atabakiniye. Manzi Thierry Rayon sports yagenderagaho mu mutima wa ba myugariro afite imvune y’ivi, agiye kubagwa kandi iyi shampiyona ishobora kuzarangira atagarutse mu kibuga. Mutsinzi Ange wajyaga asimbura ari mu bitaro kubera uburwayi.

Umunyamabanga wa Rayon sports Gakwaya Olivier abajijwe niba hari ibiganiro n’aba basore, yasubije Umuseke ko bashaka ba myugariro ariko atavuga amazina. Yagize ati:

“Umutoza yadusabye kongera imbaraga muri ba myugariro. Ariko ntiyatubwiye amazina y’abo ashaka. Nta byinshi navuga kuri abo Police yirukanye kuko n’isoko ryo kugura ntiriratangira. Mugabo (Gabriel) ari kw’isoko nk’abandi tubashije kuvugana tukumvikana twakorana.” – Gakwaya Olivier.

Rayon sports iyoboye urutonde rwa shampionat ni iya kabiri imaze gutsindwa ibitego bike (bibiri) muri shampiyona y’u Rwanda, inyuma ya Espoir FC imaze gutsindwa igitego kimwe. Rayon ubu irakoresha abakinnyi babiri mu mutima w’ubwugarizi badafite ubasimbura; Munezero Fiston na Mugisha Francois bita Master.

Roben NGABO
UM– USEKE.RW