Trump ngo navanwe kuri Twitter

Keith Ellison umwe mu bagize Inteko Ishinga amategeko ya USA yavuze ko yumva Perezida Donald Trump akwiye kuvanwa ku rubuga nkoranyambaga rwa Twitter kuko ngo ibyo amaze kurukoraho byo gusebya abantu bihagije, kandi ari nako asebya igihugu ayoboye.

Ellison uhagarariye Leta ya Minnesota mu Nteko ya US yatangaje kuri uyu wa kane ko amagambo Trump yavuze ku muyobozi w’ikiganiro gica kuri Television witwa Mika Brzezinski akwiye gutuma ubuyobozi bwa Twitter bugira icyo bukora bukavana uyu mugabo kuri uru rubuga.

Donald Trump kuwa kane mu gitondo cya kare (5.52AM) yabyutse atuka anasebya umunyamakuru Mika amuvugaho amagambo mabi benshi bongera gutungurwa nanone no kubona Perezida ubyuka acyocyorana n’abantu ku karubanda.

Trump yavugaga ko yumvise ko ikiganiro cy’uyu mugore ko ngo kimuvuga nabi, maze nawe amwifatira ku gahanga ati “ Numvise ko bamvuga nabi none sinkireba ikiganiro cyabo…Ese ubundi ni gute  Mika w’ubwenge bucye na mugenzi we Joe w’ikibazo mu mutwe baje kundeba inshuro eshatu kuri Mar-a-Lago (ni ihoteli ya Trump iri Florida) bashaka cyane ko tubonana…Mika yavaga amaraso cyane mu maso kubera kwibagisha mu maso.”

Abantu benshi bongeye gutangara babonye aya magambo y’uyu mu Perezida wa US, abakomeye bamwe bavuze ko bidakwiye kwihanganirwa.

Abastar ba cinema muri Hollywood n’aba muzika nabo bagaye cyane uyu Trump, nka John Legend we yavuze ko Amerika yibeshye igatora Perezida ‘mubi cyane’.

Intumwa ya Leta Keith Ellison we akaba asaba Twitter kuvana uyu mugabo kuri uru rubuga kubera amabi ari kuhakorera.

AbaStar bagaye cyane amagambo ya Trump

Wowe ubona abanyamerika baribeshye mu gutora Trump?

UM– USEKE.RW