Tour du Rwanda: Nsengimana yegukanye Etape III Kigali >>>Musanze

Etape ya III ya Kigali >>> Musanze (102Km) yatangiriye ku Kicukiro kuri uyu wa gatatu, baca Gishushu bakomeza Nyarutarama bamanuka Nyabugogo bazamuka Shyorongi bose bakuri kumwe. Batangiye kuzamuka Shyorongi Suleiman Kangangi wa Kenya yongeye kuva mu bandi arabasiga aka gasozi gaterera cyane kose. Abasiganwa bari bigabanyijemo ibikundi (peloton) nk’eshanu kubera uburyo uyu musozi uterera. Abasiganwa bagiye kugera i Musanze Jean Bosco Nsengimana ariwe uri imbere yegukana aka gace ka gatatu ka Tour du Rwanda.

Bageze hejuru za Gasiiga Hadi Janvier na Valens Ndayisenga basohotse muri Peloton y’imbere barasatira bafata umwanya wa mbere, Hadi niwe wari imbere, Kangangi Suleiman yahise asubira inyuma mu gikundi ngo aruhukeho.

Abasiganwa bageze kuri Nyirangarama ahasohoka mu karere ka Rulindo ufata Gakenke abasore Hadi Janvier na Valens Ndayisenga bakiri imbere y’isiganwa.

Binjiye mu karere ka Gakenke umusore Areruya Joseph yacomotse mu gikundi arasatira yegera Hadi Janvier na Valens Ndayisenga.

Teshome Meron wo muri Eritrea nawe yahise asatira aba ba mbere ajya hafi cyane ya Areruya Joseph bari inyuma ya Hadi Janvier.

Batangiye kuzamuka umusozi wa Buranga, Jean Claude Uwizeye w’ikipe y’Akagera nawe yahise asatira yagera cyane Hadi Janvier, Nsengimana Jean Bosco ufite maillot jaune nawe yahise acomoka mu bandi asatira Hadi uri imbere.

Valens Ndayisenga we yabaye nk’usubira inyuma gucungana na kabuhariwe Debesay Mekseb ngo atabacika.

Bageze mu Kivuruga mbere gato yo gusohoka mu karere ka Gakenke ngo winjire mu ka Musanze, Jean Claude Uwizeye na Areruya Joseph bahise basatira Hadi Janvier nk’abashaka kumuruhura bafata umwanya wa mbere.

Byagaragaye ko Hadi Janvier yasaga n’usoje akazi ke kuko yayoboye kuva Tour ikirenga Shyorongi na Rusiga muri Rulindo.

Basatira kwinjira i Musanze Jean Bosco Nsengimana na Patrick Byukusenge basatiriye bikomeye, Nsengimana ariko afata umwanya wa mbere.

Valens Ndayisenga we yakomeje guhura n’akaga kuko abakinnyi bose baramuzi, yageragezaga kuvamo.

Jean Bosco Nsengimana w’imyaka 21 ukinira ikipe ya Kalisimbi yasize abandi yinjira imusanze asize Patrick Byukusenge wafashe  umwanya wa kabiri ho amasegonda 17, Areruya Joseph na Valens Ndayisenga barakurikira.

Imyanya itanu ya mbere yafashwe n’abanyarwanda, maillot jaune igumana Nsengimana ubu wasizeho abamukurikiye ibihe bigera ku munota umwe.

Abakinnyi 68 batangiye irushanwa hasigaye 58. Umukinnyi ugeze ku murongo wo gusoza inyuma ho iminota 45 uwa mbere ahita avanwa mu irushanwa, abakinnyi bane muri batanu b’ikipe ya Misiri barasezerewe. Umwe wo muri South Africa, umwe wo mu Budage, uwo muri Argentine, Croatia na Uzbekistan nabo barasezerewe.

Uko uyu munsi bakurikiranye n’ibihe bakoresheje:

Uko bahagaze muri rusange kugeza ubu:

Photos/Umuseke

UM– USEKE.RW