Teta Diana yasezeye muri PGGSS 6

Kuri iki cyumweru, abicishije kuri Facebook account ye, umuhanzi Teta Diana yatangaje ko asezeye mu irushanwa rya Primus Guma Guma Super Star ya gatandatu.

Teta yari mu bahanzi 10 batorewe kujya muri iri rushanwa rya muzika rya mbere rikomeye mu Rwanda.

Teta yavuze ko asezeye kubera ko iri rushanwa rihuriranye n’intego zikomeye yiyemeje kugeraho uyu mwaka zirimo no gusohora Album ye ya mbere bityo ko atabifatanya.

Muri uyu mwaka, niwe muhanzi wa mbere wivanye  mu 10 batorewe guhatana muri iri rushanwa abahanzi benshi baba bifuza kujyamo kubera inyungu nini y’amafaranga no kugaragara mu gihugu hose barivanamo.

Teta ni umuhanzi ukunze guhabwa amahirwe yo guherekeza abayobozi bakuru b’igihugu mu bikorwa bitandukanye mu mahanga, aho biba bikenewe kwerekana umuco w’u Rwanda mu ndirimbo.

Teta yari mu bahanzi 10 bahataniye Guma guma y’umwaka ushize yegukanywe na Knowless Butera. Icyo gihe yabaye uwa 10.

Teta amenyerewe cyane cyane mu ndirimbo z’umuco, gusa akanagira zimwe na zimwe zicuranze mu njyana z’ubu zirimo ikunzwe cyane yise “Velo”.

Gusezera kwe biraha amahirwe undi mukobwa wazaga hafi ku rutonde rwa 15 bari batowe mu bahatanaga kujya  muri iri rushanwa kuko rigomba kuba ririmo nibura abakobwa/abagore babiri.

Uhabwa amahirwe ubu ni Young Grace.

Ubuyobozi bwa East African Promoters na BRALIRWA bufatanya gutegura iri rushanwa ntiburatangaza usimbura Teta Diana.

Joel Rutaganda
UM– USEKE.RW