Somalia: Umunyamakuru wicishije bagenzi be yarashwe

Itsinda ry’abarashi bishe umunyamakuru wo muri Somalia witwa Hassan Hanafi mu murwa mukuru Mogadishu nk’uko bitangazwa na BBC. Uyu musore w’imyaka 30 akaba yari aherutse gukatirwa urwo gupfa mu kwezi gishize kubera gufatanya na Al Shabab kwica abanyamakuru batanu.

Abanyamakuru benshi ngo batumiwe ngo baze kureba uko uyu yicwa, bavuga ko Hanafi yashatse kurwana ubwo yari ajyanywe aho bamwiciye gusa Police ngo yari yamuziritse.

Hanafi yahoze ari umunyamakuru kuri Radio nyuma aza kujya muri Al Shabab anayifasha kwica abandi banyamakuru bavugaga ibikorwa bibi byayo.

Kuva mu 2007 kugeza 2011 Hanafi yakoreraga Al Shabab mu kuyereka abantu bakwiye kwicwa.

Mu 2009 Al Shabab yaramuzamuye imugira Komanda, umwaka wakurikiyeho yakomerekeye mu mirwano n’ingabo zirwanya Al Shabab.

Ubwo yari muri Al Shabab ngo yahamagaraga abandi banyamakuru akababwira ko nibataza muri uyu mutwe bazabica.

Uyu yafatiwe muri Kenya mu 2014 aho yari yarahungiye yoherezwa muri Somalia ku busabe bwa Leta yaho,  atangira kuburanishwa n’urukiko rwa gisirikare.

Mu kuburana kwe yemeye ko Al Shabab yishe abanyamakuru benshi, ariko we ubwe yishe umwe.

Aho yagize ati “Ariko ntacyo bimbwiye n’iyo mwanyica. Muzareba niba nimpfa ubwicanyi buzahagarara.

Uyu mugabo yemera ko yicishije abanyamakuru bagenzi be nka; Mahad Ahmed Climi, Ali Iimaan Sharmaake, Said Tahliil Ahmed, Muktaar Mohammmed Hiraabe na Sheekh Nuur Abkeey bose bishwe na Al Shabab.

Urukiko rwanzuye ko nawe akwiye kwicwa arashwe, bikaba byakozwe kuri uyu wa 10 Mata 2016.

UM– USEKE.RW