Sibomana Abuba ntiyajyanye na Gor Mahia muri CECAFA Kagame cup
Abouba wahoze muri Rayon ubu ari muro Gor Mahia
Myugariro w’ikipe y’igihugu y’u Rwanda Amavubi, Sibomana Abouba ntari mu bakinnyi ikipe ya Gor Mahia yo muri Kenya yahagurukanye nabo berekeza muri Tanzaniya mu irushanwa rya Cecafa Kagame Cup.
Sibomana Abouba na mugenzi we Innocent Wafula basigaye muri Kenya kubera ikibazo cy’ibyangombwa by’inzira.
Gor Mahia yerekeje muri Tanzaniya kuri uyu wa kane mu irushanwa rya CECAFA KAGAME CUP rizatangira kuri uyu wa gatandatu, tariki 18 Nyakanga, rigasozwa tariki 2 Kanama 2015.
Ronald Ngala, umunyamabanga wa Gor Mahia yatangaje ko aba bakinnyi bombi bakomeje gushakirwa ibyangombwa kugira ngo basange bagenzi babo muri Tanzaniya.
Gor Mahia ifite ibikombe 5 bya CECAFA izakina umukino wa mbere, ku wa gatandatu, ihura na Yanga Africans banganya ibikombe, mu mukino ubanza wo mu itsinda rya mbere.
Cecafa Kagame Cup y’uyu mwaka amakipe 12 azayitabira agabanyijwe mu matsinda atatu:
Itsinda rya mbere ririmo Yanga (Tanzania), Gor Mahia (Kenya), Khartoum (Sudan), Telecom (Djibouti), KMKM (Zanzibar).
APR FC iri mu itsinda rya 2, hamwe na Al Shandy ( Sudan), LLB (Burundi) na Elman ( Somalia).
Itsinda rya 3 rigizwe na Azam (Tanzania), Malakia (South Sudan), KCC (Uganda), Adama City (Ethiopia).
Jean Paul NKURUNZIZA
UM– USEKE.RW
English