Shampiyona mu Bwongereza, ubushobozi buke kuri Arsenal

Kuri uyu wa gatandatu ni bwo Shampiyona mu gihugu cy’Ubwongereza, English Premier League 2013-2014 yatangiye, amakipe amwe yitwaye neza, Liverpool na Manchester United zatsinze imikino yazo, Arsenal ku kibuga cyayo ihanyagirirwa ibitego 3-1 na Aston Villa.

Ikipe yatunguwe, ikanatungura benshi ni ikipe y’Arsenal y’umutoza Arsène Wenger yatsinzwe na Aston Villa ku kibuga cyayo cya Emirates.

Olivier Giroud wari rutahizamu yafunguye amazamu ku ruhande rw’Arsenal ku munota wa gatandatu, benshi batangira kwibaza ko nk’ibisanzwe Gunners (Abarashi) batsinda umukino kuko badaheruka no gutsindwa umukino wa mbere wa shampionat.

Imbaraga nkeya z’Arsenal zagaragaye ku munota wa 23 ubwo umukinnyi Christian Benteke, Umubiligi yatsindaga penaliti yari ikoreshejwe n’umuzamu w’Arsenal.

Ku munota wa 62 Aston Villa yabonye indi penaliti, na none Christian Benteke arayinjiza.

Myugariro w’Arsenal Laurent Koscielny yaje gusohorwa abaonye ikarita ya kabiri y’umuhondo ku munota wa 66 Arsenal basigara ari icumi mu kibuga maze baragorwa.

Ibihe bigoye kuri Arsenal no ku bafana bayo mu mukino, byaje ku munota wa 85 ubwo Antonio Luna yatsindaga igitego cy’agashyinguracumu.

Umukinnyi Santi Cazorla wari wabanje hanze ku ruhande rw’Arsenal, yaje kwinjira gusa ntacyo byahinduye n’ubwo ku munota wa 78 yabonye uburyo umupira ugarurwa n’igiti cy’izamu.

Nyuma y’umukino umutoza Arsène Wenger yatangaje ko kugura abakinnyi atari byo ashyize imbere kandi ko ntaho bihuriye no kuba yatsinzwe.

Yatangarije abanyamakuru ko icyo ashyize imbere ari umukino wo gushaka itike yo gukina imikino ya nyuma ya UEFA Champions League.

Uyu mukino uteganyijwe kuri uyu wa kabiri mu gihugu cya Turukiya, aho Arsenal izakina na Fenerbahce.

Liverpool ku ruhande rwayo ni yo kipe yatsinze igitego gifungura Shampiyona uyu mwaka, igitego cya Daniel Sturridge ku munota wa 37, yatsinze Stoke City yananiwe kwinjiza penaliti yaraswe n’umukino Walters.

Liverpool niba nta gihindutse ni ikipe itanga ikizere, umukinnyi Phillip Coutinho bavanye muri Inter de Milan yerekanye ko ari umuhanga cyane hagati kandi yiteguye gukinana neza naba rutahizamu ba Liverpool.

Manchester United n’umutoza mushya, David Moise uherutse no kuyihesha igikombe gifungura shampiyona, yerekanye ko ubugi mu ikipe ye bugikeba, ubwo yanyagiraga Swansea City 4-1.

Ibitego bya Robin Van Persie na Danny Welbeck

Indi mikono, yo ku munsi wa mbere wa shampiyona ikunzwe cyane y’abongereza.

Norwich 2 – 2 Everton

Sunderland 0 – 1 Fulham

West Bromwich Albion 0 – 1 Southampton

West Ham 2 – 0 Cardiff

Swansea 1 – 4 Manchester United

Kuri iki cyumweru, Crystal Palace yazamutse mu cyiciro cya mbere irakina na Tottenham, Chelsea na Jose Mourinho nabo bakine na Hull City Tigers mu gihe kuwa mbere Man City n’umutoza mushya Perigrini bazakina na Newcastle United yo mu majyaruguru y’uburasirazuba bw’ubworereza.

HATANGIMANA Ange Eric
UM– USEKE.RW