Shampionat: Rayon Sport yanganyije na Police FC

Kuri icyu cyumweru tariki 11 Werurwe, Police FC yanganyije na Rayon Sport ibitego 2-2 mu mukino w’umunsi wa 15 wa shampionat y’ikiciro cya mbere cy’umupira w’amaguru. ibi byongereye urujijo ku ikipe izegukana igikombe mu minsi 9 isigaye.

Nyuma y’aho ikipe ya Police yari yatsinzwe ku munsi wa 14, gutsinda uyu mukino byari kuyisubiza umwanya yambuwe na MukuraVS, ariko byarangiye igumye ku mwanya wa kabiri, Rayon sport nayo inanirwa guhigika APR ngo iyivane ku mwanya wa 3.

Mu mukino wari witabiriwe n’abantu benshi, bidatunguranye iyo Rayon yakinnye, ku munota wa 11 Jamal Mwiseneza wa Rayon yanyeganyeje inshundura abafana ba Rayon batangira kuririmba.

Ku munota wa 34 Hamis Cedric yatsinze igitego cyiza, mu gihe yari mu nguni (angle fermé) atera ishoti rica ku munyezamu wibwiraga ko agiye kugarurira ba rutahizamu  (gutera centré).

Nyuma y’uko igice cya mbere kirangiye ari 2-0, umudiho n’ibyishimo byagaragaraga muri stade yose, mu igice cya kabiri ntibyakomeje bityo. Ku munota wa 63 umunya Brazil wa Police FC witwa Rivaldo yatsinze igitego cya mbere, imbeho itangira gutaha abafana ba Rayon.

Ba myugariro ba Rayon; Frank Makengo, Ndayisaba Floribert,  Abouba Sibomana na Nizigiyimana Karim ntabwo bahagaze neza mu gice cya kabiri, kugeza ubwo ku munota wa 72 Kagere Meddy aciye mu rihumye Frank Makengo akamutsindana igitego bari kumwe.

Rayon yabonye ubundi buryo butandukanye bwo gutsinda. Ishoti rya Jamal ryafashe umutambiko, na Cedric wateye umutwe umupira ugaca ku ruhande, umupira waje kurangira amakipe yombi anganyije, abantu benshi bataha ubona bakonje, nk’ibisanzwe iyo Rayon yanganyije cyangwa yatsinzwe.

Mu kiganiro n’abanyamakuru, umutoza Goran Kuponovic wa Police yatangaje ko ashimishijwe n’umusaruro w’uyu munsi kuko Rayon ari ikipe azi neza ko ikomeye.

Naho Jean Marie Ntagwabira utoza Rayon, we yemeje ko amakosa ya ba myugariro ariyo atumye atarara ku mwanya wa gatatu. Yongeyeho ko n’imyitwarire ya bamwe mu bakinnyi yabigizemo uruhare.

“ Bokota Labama yanze gukina kandi yarakoze imyitozo yanyuma, Sina Jerome we ubu yasubiye i Congo atubeshya ngo ararwaye kandi twaramunyujije no mu cyuma tugasanga ntacyo arwaye, imyitwarire nk’iyi njyewe ntwabwo nayihanganira” Jean Marie Ntagwabira.

Usibye aba bakinnyi bombi Ntagwabira yabuze, avuga kandi ko kuba Nshimiyimana Iddy, Papy Kamanzi na Leandre Sekamana bari bafite amakarita abiri y’umuhondo byari imbogamizi kuko nta basimbura bahagije yari afite.

Imikino y’umunsi wa 15 uko irangiye yose

Kuwa gatandatu tariki 10 Werurwe

APR FC 2-0 AS Kigali (Stade de Kigali)
Kiyovu Sports 1-2 Marines FC (Stade Mumena)
Espoir FC 0-2 Mukura VS (Rusizi)
La Jeunesse yararuhutse

Ku cyumweru tariki 11 Werurwe
Isonga FC 1-0 Etincelles FC (Stade de Kigali)
Police FC 2-2 Rayon Sports (Stade Amahoro)
Nyanza FC 0-0 Amagaju FC (Nyanza)

 Urutonde rw’agateganyo

NO                 TEAM            P             W            D             L              F              A             GD          PTs

01           MUKURA VS      15           10           3              2              20           10           10           33

02           POLICE FC            15           9              4              2              24           10            14          31

03           APR FC                14             8              3              3              24           14           10           27

04           RAYON S              14           7              5              2              25           15           10           26

05           KIYOVU S            13           6              4              3              17           14           3              22

06           ETINCELLES FC   14           4              7              3              15           13           2              19

07          ISONGA FC         14           5              4              5              14           16           -2            19

08            LA JEUNESSE      14           5              2              7              15           16           -1            17

09           MARINES FC       15           4              3              8              12           17           -5            15

10           AMAGAJU FC    15           4              2              8              12           21           -9            15

11           NYANZA FC         14           3              3              7              9              12           -3            13

12           AS KIGALI            14           3              3              8              10           21           -11          12

13           ESPOIR FC           13           1              3              9              9              24           -11          6

Hatangimana Ange Eric
UM– USEKE.COM