Sena yemeje ishingiro ry’umushinga w’itegeko rishyiraho “University of Rwanda”

Kuwa kabiri tariki ya 02 Nyakanga niho Inteko rusange  ya Sena yemeye ishingiro  ry’Umushinga w’itegeko rishyiraho urwego rwa Kaminuza imwe y’u Rwanda rikagena inshingano, imiterere n’imikorero yarwo.

Byabaye nyuma yaho muri Gicurasi umutwe w’abadepite wamaze gutora uwo mushinga w’itegeko, iyi Kaminuza y’u Rwanda (UR:University of Rwanda) izahurizwamo icyari Kaminuza nkuru y’u Rwanda(NUR) nandi mashuri makuru ya leta.

Izagira icyicaro mu mujyi wa Kigali, biteganyijwe ko cyazaba kiri ku ishuri rikuru ry’imari n’amabanki(SFB) i Mburabuturo ya Gikondo bitewe nuko ngo ariho harimo kuboneka inyubako ubuyobozi bwayo bwakoreramo. Ibi ariko ngo ni agateganyo.

Iyi Kaminuza imwe igomba gutangira umwaka w’amashuri utaha ( 2013-2014)  aho ubu biteganyijwe ko uzatangira muri Nzeri.

Minisitiri w’uburezi Dr Vincent BIRUTA wagejeje  ishingiro ry’uwo mushinga w’itegeko ku intekorusange ya Sena akaba avuga ko  wateguwe mu rwego rwo kuzamura ireme ry’uburezi no guhuza ibigo bya Leta  ngo byo gutatanya imbaraga.

Ibi bigo ngo bizajya bisangira bimwe mubikoresho ndetse kandi bigabanye n’amafranga yajyaga atangwa ku balimu babaga bavuye hamwe bagiye kwigisha ahandi (visit) kandi bigisha amasomo amwe bagahembwa n’umukoresha umwe ahantu habiri.

Minisitiri w’uburezi avuga ko iyi Kaminuza bizayifasha  kubona agaciro ku rwego mpuzamahanga aho ngo kuri ubu iyo ufashe ikigo kimwe usanga kitagaragaza uburemere mu ipiganwa mpuzamahanga ariko ngo nibihurizwa hamwe, abalimu n’abashakashatsi bose bari hamwe bizafasha iyo Kaminuza y’u Rwanda kugira imbaraga no ku rwego mpuzamahanga  .

Uwo mushinga w’itegeko uvuga  ko  Kaminuza y’u Rwanda izaba igizwe na za koreji (Collège) esheshatu (6),  izatangira gutanga impamyabushozozi umwaka utaha w’amashuri.

Ubu abanyeshuri barangije uyu mwaka bo bazahabwa impamyabushozi z’ibigo bari basanzwemo mugihe abarimo kwiga batararangiza bo bagomba guhera umwaka utaha w’amashuri bahabwa impamyabushobozi za Kaminuza y’u Rwanda imwe.

Uyu mushinga w’itegeko uha urwego rwa Kaminuza ubushobozi bwo gushora imari  mu bibyara inyungu murwego rwo korohereza leta igihe iyi Kaminuza izaba yakoreye ubwayo amafaranga.

Koreji 6 “University of Rwanda” nahateganyijwe ibyicaro byazo:

Koreji y’inderabarezi (icyicaro KIE), koreji y’ iby’Indimi n’Ubumenyi bw’Imibereho y’Abaturage (icyicaro Huye aho NUR iri ubu), koreji y’ubumenyi n’ikoranabuhanga ( icyicaro KIST), Koleji  y’ iby’Ubucuruzi n’Imari (icyicaro SFB) ari naho icyicaro cya Kaminuza  y’u Rwanda kizaba kiri, Koleji y’Ubuvuzi n’Ubuzima( icyicaro KHI)  na Koreji y’Ubuhinzi n’ubuvuzi bw’amatungo ikaba izaba ifite icyicaro i Busogo muri Musanze.

“University of Rwanda” izaba ifite umuyobozi w’ikirenga (Chancellor )  naho  buri koleji yose izaba ifite umuyobozi wayo.

Umushinga w’itegeko rishyiraho urwego rwa Kaminuza y’u Rwanda rikagena inshingano, imiterere n’imikorero yarwo nyuma yaho abasenateri bemereye ishingiro ryawo ukaba ugiye gusuzumirwa muri komisiyo ya Sena ibifite mu nshingano nyuma yaho izakore raporo izashyikiriza Intekorusange.

Nuramuka utowe bizatesha agaciro Kaminuza nkuru y’u Rwanda (NUR) n’amashuri makuru ya leta yari asanzweho ariyo KIST,KHI, ISAE, UPU,SFB na KIE maze byose bihurizwe hamwe bibe Kaminuza y’u Rwanda.

Ubu muri Kaminuza n’amashuri makuru ya Leta harabarizwamo abanyeshuri hafi ibihumbi 37.

Emmanuel TUYISENGE
UM– USEKE.RW