Rwanda Cycling cup: Areruya Joseph yegukanye isiganwa Kigali – Nyagatare

Rwanda Cycling Cup yatangiye kuri uyu wa gatandatu tariki 7 Gicurasi 2016. Areruya Joseph niwe watangiye atsinda isiganwa rya mbere Kigali – Nyagatare.

Abasiganwa 46 bavuye mu makipe umunani bahagurutse kuri stade Amahoro saa 09:15. Basoreje i Nyagatare bayobowe na Areruya Joseph w’ikipe ya Les Amis Sportif y’i Rwamagana.

Bahagurutse i Kigali hitezwe ihangana rikomeye hagati ya Byukusenge Patrick, Hakuzimana Camera na Mugisha Samuel ba Benediction Club, Karegeya Jeremy wa Cine Elmy, na Areruya Joseph, Uwizeye Jean Claude na Tuyishimire Ephraim ba Les Amis Sportif.

Basohoka muri Kigali binjira Rwamagana, nibwo abasore ba Les Amis Sportif batangiye kuyobora igikundi, kuko bifuzaga kugera iwabo i Rwamagana bari imbere.

Byabahiriye kuko bageze mu mugi wa Rwamagana, Uwizeye Jean Claude ari we uri imbere.

Aha Rwamagana niho abasiganwa batarengeje imyaka 18 batangiriye isiganwa.

Basohoka muri Rwamagana bafata Kayonza,

Karegeya Jemeremy umwe mu bahabwaga amahirwe, yatobokesheje inshuro ebyiri, bituma abo bahanganye bamucaho.

Binjiye muri  Gatsibo, Areruya Joseph wa Les Amis Sportif na Patrick Byukusenge wa Benediction Club bacomoka mu gikundi,  bagera i Kiramuruzi bayoboye.

Abasiganwa bageze Nyagatare, Areruya Joseph (wa Les Amis Sportif) ari we uyoboye abandi. Ingabire Beatrice (wa Les Amis Sportif) ayoboye abagore, Izabayo Eric (wa Benediction Club) ayoboye abatarengeje imyaka 18.

AMAFOTO / Mugunga Evode

Roben NGABO

UM– USEKE