Rwamagana: Uwitwa Higiro yajujubije abapfakazi abatera ubwoba

Abapfakazi bo mu karere ka Rwamagana mu murenge wa Gishari, Akagari ka Binunga baravuga ko bajujubijwe n’umugabo witwa Adolphe Higiro ubahoza ku nkeke ababwira ko azabica. Umuyobozi w’Akarere ka Rwamagana we avuga ko abaturage bakwiye kugaragaza ibimenyetso kubyo barega uyu mugabo.

Bimwe mubyo aba babyeyi barega uyu mugabo harimo kubabwira ko azabahambira akabajugunya mu kiyaga cya Muhazi, kuba arara acuragura mu ngo z’abo akagerekaho no kuboneshereza uko yishakiye.

Silas Havugiyumva avuga ko kuba umuntu yivugira ko azica abantu byonyine akwiye kuba abibazwa bitaraba.

Abaturage biganjemo abapfakazi ahohotera akoresheje iterabwoba bavuga ko bafite impungenge ko ikibazo cyabo kizahagurukirwa hari uwo yishe nk’uko abivuga.

Aba baturage bavuga ko ikibazo cyageze mu buyobozi uyu mugabo ngo atabwa muri yombi ariko hashira iminsi akarekurwa kuko ngo habura ibimenyetso.

Umuyobozi w’Akarere ka Rwamagana avuga ko nta muntu uri hejuru y’amategeko. Avuga ko  ikibazo cya Higiro bakizi kandi bari kugikurikirana bafatanyije n’inzego zibishinzwe.

Nehemia Uwimana yabwiye Umuseke ko hashize iminsi itanu Higiro ari mu maboko ya Polisi agasaba abaturage gukurikirana bagatanga ibyo bamurega ku nzego zibishinzwe.

Nehemia avuga ko imapmvu ituma uyu mugabo bashinja ubugizi bwa nabi afatwa akarekurwa ari uko iyo ageze mu maboko ya polisi nta muturage ujya gutanga ikirego, kandi ngo polisi ikaba itakomeza gufunga umuntu idafitiye ikirego.

Ati “Uyu mugabo amaze kugaragaza ko ibyo akora birimo agasuzuguro niyo mpamvu kuwa kane ushize kugeza ubu ari mu maboko ya polise”

Umuyobozi w’Akarere ka Rwamagana avuga ko mubyo uyu mugabo avugwaho ikigaragara nibura ari ukonesha imirima y’abandi naho ibindi ngo nta bimenyetso bifatika bigaragazwa.

Asaba abaturage gushaka ibimenyetso by’ibyo bashinja Higiro yaba mu byo avuga bibi azabakorera ndetse no mu byo bamurega byo gucuragura ku mazu yabo nijoro.

Joselyn Uwase
UM– USEKE.RW