Rwamagana: Inzara yateye ubujura bukabije

-Kubera ubukene hateye ubujura bukabije
-Abaturage barinubira ko abajura badahanwa
-Ubuyobozi burashyira mu majwi abaturuka mu tundi duce

Iburasirazuba – Abatuye mu murenge wa Karenge Akarere ka Rwamagana baravuga ko bafite ikibazo cy’ubujura bukabije bwibasira amatungo n’ibindi, bakavuga ko ubu bujura budasanzwe bwatewe n’inzara yibasiye aka gace kuko abahatuye nta myaka bejeje kubera izuba rikabije. Ubuyobozi bw’Umurenge wa Karenge buravuga ko bwizeza abaturage ko buri gukora ibishoboka ngo iki kibazo gikemuke.

Umurenge wa Karenge uherereye mu bice by’icyaro abawutuye benshi ni abahinzi borozi. Iyo habayeho impamvu yo kuteza imyaka haba ikibazo cy’imibereho. Mu minsi ishize izuba ryabaye ryinshi muri aka gace bituma bateza.

Gabriel Ruzindana utuye muri uyu murenge yabwiye Umuseke ati “Dufite ikibazo cy’inzara yavuye kuri ririya zuba, ubu baratwaka mituweli tukayibura, uniforme y’umwana ni ikibazo, abajura nabo bameze nabi, aho bamenye ko ufite agatungo baragutera.”

Undi witwa Anaclet Munyabusisiro “Twahinze imyaka iragenda irarigita, tugiye guhinga no kugishanga cy’Akagera umugezi uraza urubika imyaka yose iratwarwa. Ubu turashize ntiwabyumva”.

Iki kibazo ngo cyatumye haduka ubujura burimo ubwo kumena amazu, kwiba amagare aho apariste ndetse n’ibindi. Ubujura ngo bwafashe umurego udasanzwe muri ibi bihe.

Munyabusisiro akomeza agira ati “Iyo umuntu abuze icyo kurya araza agaterura igare aho riparitse, ubu sinakubwira agahene baraza bakazitura nkuzitura iye”.

Undi witwa Ruzindana we avuga ko icyo abaturage binubira cyane cyane ari uko na bamwe muri aba bajura iyo bafashwe bafungwa iminsi micye bakongera kugaruka aho bagasubira mu bujura.

Ubuyobozi bw’umurenge wa Karenge buvuga ko koko aba baturage batejeje nk’uko bisanzwe, gusa n’ubujura nabwo ubuyobozi buremera ko buhari ariko bugatanga ikizere ko bagiye kubishyiramo ingufu nk’uko bivugwa n’Umunyamabanga Nshingwabikorwa w’Umurenge wa Karenge Marc Rushimisha.

Rushimisha ati “Nibyo koko mu minsi ishize hagiye hagaragara abajura ariko twarabafashe barafungwa twifashishije irondo ryacu ry’umwuga, n’ubwo bamwe bagiye barekurwa ariko bahawe ibihano. Gusa abiba ahanini ni abava mu mirenge duhana imbibi. Ariko turizeza abaturage ko inzego z’ubuyobozi ziri kubikurikirana”.

Uretse muri uyu murenge wa Karenge havuzwe ikibazo cy’ubujura bo bavuga ko buterwa n’inzara yibasiye aka gace, ikibazo nk’iki cyagiye kigaragara no mu bindi bice bitandukanye by’Intara y’Iburasirazuba by’umwihariko mu karere ka Kayonza na Kirehe nko mu bice bya Ndego aho banatanze ibiribwa ku baturage bari bugarijwe n’inzara kubera imyaka yabo yumishijwe n’izuba.

Elia BYUK– USENGE
UM– USEKE.RW