Rwamagana: Abadepite batumije abayobozi bababaza ku bibazo babwiwe na rubanda

Rwamagana – Nyuma yo gusura utugari twose turi mu karere ka Rwamagana bumva ibibazo binyuranye by’abaturage kuri uyu wa kabiri itsinda ry’Abadepite ryicaranye n’abayobozi ku nzego zinyuranye z’aka karere bababaza ku bibazo bagejejweho n’aba baturage n’ibyo nabo biboneye ubwabo.

Mu bibazo bagaragarijwe harimo isuku nke cyane cyane mu bana, abana bataye amashuri, abana b’abakobwa babyara bakiri bato, imisarani idakwiriye, abambuwe amasambu, abimuwe ntibabone ingurane, amashuri ya 9YBE afite ikibazo cy’ubucucike,  abaturage boneshereza abandi, kutaringaniza imbyaro n’ibindi…

Hon. Mukayuhi Rwaka Constance wari uyoboye itsinda ry’abadepite yavuze ko ingendo bakoze  zari zigamije kugenzura n’ubundi bimwe muri ibi bibazo kandi bari babanje kubiganiraho n’izo nzego zibishinzwe hamwe n’abaturage, ngo basanze hari ibyakosowe n’ibindi bigikenewe gukosorwa cyane cyane isuku nke n’abana bata ishuri.

Hon Rwaka ati “Turifuza ko ikibazo cy’isuku, imirire mibi n’abana bata ishuri byafatirwa ingamba zihoraho kandi niba ikibazo cyagaragaye kigomba kubonerwa umuti.  

Twahaye urubuga abaturage kugira ngo batubwire uburyo inzego za Leta zibagezaho serivisi,  niba zibageraho,  twasanze hari n’ibindi bibazo biri rusange nk’ibikorwa remezo nk’amavomero yari yarafunzwe, imihanda abaturage bakeneye mu rwego rwo guhahanirana, ikibazo cy’amashanyarazi gusa ibi ni gahunda ya Leta igisigaye ni ugukorwa vuba .”

Hon. Mukayuhi Rwaka yavuze ko mu bindi bibazo basanze harimo ibishingiye ku butaka, amakimbirane mu ngo hamwe   n’abana b’abakobwa batwara inda zitateganyijwe.

Ubuyobozi busa n’ubusubiza ibi bibazo bwagiye bugaragaza ko ngo abana bari barataye amashuri abenshi bayasubiyeho kandi ngo bamaze igihe mu bukangurambaga ngo bwakozwe inzu ku yindi bushishikariza ababyeyi kwita ku burezi bw’abana.

Rajabu Mbonyumuvunyi uyobora Akarere ka Rwamagana yavuze ko abadepite bagiye babagira inama ndetse n’ibitaragenze neza bagiye kubinoza.

Mbonyumuvunyi ati “ tugiye gushyiramo imbaraga ibyari bitaranoga binoge, abaturage tubahe serivisi nziza kuko kubakemurira ibibazo biri munshinga zacu no kumenya imibereho.”

We yemeza ko ubu abana bose bari barataye ishuri barisubiyeho ndetse ko ikibazo cy’isuku nke mu baturage mu karere ka Rwamagana kigenda kigabanuka uko bagenda babikangurirwa.

Bimwe muri ibi bibazo byahagurukije Abadepite biri mubyo uturere duhigira guhigura mu mihigo ya buri mwaka. Mu mihigo y’uyu mwaka (2015/16) Akarere ka Rwamagana kaje ku mwanya wa 17.

Daddy SADIKI RUBANGURA
UM– USEKE.RW