Rutsiro: Icyayi cyabateje imbere kubera Kagame bityo ngo baracyamushaka

Inteko rusange igize koperative y’icyayi ya RUTEGROC mu karere ka Rutsiro, Umurenge wa Gihango,  kuri uyu wa 29 Mata 2015 ubwo bagira inama yo kungurana ibitekerezo ku buhinzi bw’icyayi bagamije kurushaho gushaka umusaruro ushimmishije, bishimiye aho bamaze kugera mu mibereho maze baheraho bavuga ko byose babikesha umukuru w’igihugu bityo batanga icyifuzo cy’uko abadepite bahindura ingingo ya 101 y’Itegeko Nshinga rya Repubulika y’u Rwanda kugira ngo bazongere bamutore.

2 300 bagize RUTEGROC (Rutsiro Tea Growers Coperative) bavuga ko kuva batangira guhinga icyayi nta wongeye kurembera mu rugo kubera kubura ubwisungane mu kwivuza kandi babona amafaranga yo kwishurira abana amashuri bitabagoye.

Edouard  Hakizimana wo mu murenge wa Mushubati ufite imyaka 41, avuga ko ataratangira guhinga icyayi yari afite imirima ibiri gusa ariko ubu akaba ageze ku mirima irindwi ndetse akaba anatunze ihene icumi.

Hakizima ku kwezi ngo abona amafaranga ibihumbi 40 kandi yishuyeho n’inguzanyo yanaguze ibyangombwa nkenerwa. Afite icyizere cy’uko mu mwaka wa 2023 igihe azaba arangije kwishyura inguzanyo yose, azajya abona amafaranga asaga ibihumbi 300 akuye mu cyayi buri kwezi.

Nyuma yo kugaraza imbogamizi zirimo kubura imihanda ihagije ibafasha kugeza icyayi ku ruganda rwa Rwanda Mountain Tea, bavuga ko bifuza ko Perezida Kagame yakomeza kubayobora kuko babona ikizere muri we ko imbogamizi bafite zizakemuka.

Mu biganiro bagiranye n’abayobozi babo bose bagaragaje ko nta mpamvu Itegeko Nshinga bitoreye ingingo imwe mu zirigize itahindurwa ku bushake bwabo.

Ubusanzwe ingingo ya 101 y’Itegeko Nshinga ry’u Rwanda itegeka ko Perezida w’u Rwanda atorerwa manda ebyiri zidashobora kongerwa. Gusa bo bavuga ko Itegeko Nshinga aribo baryitoreye kandi rinafite ingingo zemera ko ibyatowe bishobora guhinduka ku bushake bw’abaturage. Bityo ko nabo ubu ari byo bifuza.

Nsanzimfura Jean Damscene Umuyobozi wungirije ushinzwe ubukungu mu karere ka Rutsiro yabijeje ko ikibazo cy’imihanda kizakemuka vuba kuko bafite umushinga uri hafi kubaka imihanda imwe n’imwe.

Sylvestre Barakagendana umuyobozi wa RUTEGROC, nyuma yo kumva ibyifuzo by’abanyamuryango yavuze ko byose bizasubizwa kandi n’ubutumwa yahawe akabugeza ku Nteko Nshingamategeko mu gihe cya vuba.

Barakagendana yavuze ko umusaruro w’icyayi cya Rutsiro ugenda wiyongera kuko batangiye gusarura  toni 19 mu 2013 nyuma, mu 2014 basarura 95, ubu muri uyu mwaka bakaba bafite ikizere cyo kugeza kuri toni 700 arinako ashimira Rwanda Mountain Tea yabubakiye uruganda hafi y’aho abaturage bahinga icyayi.

Koperative RUGROTEC yatangiye guhinga icyayi mu 2010, ubu ifite ubuso bwa ha 1 296 mu mirenge itandatu,  iri hafi kuzuza inzu ya miliyoni 42 izajya ikoreramo kandi inizigamye miliyoni 12 harimo ayo igenda yishyura inguzanyo yahawe na banki.

Théodomir NTEZIRIZAZA
UM– USEKE.RW