Ruswa iravuza ubuhuha ku Isi. u Rwanda ruhagaze he?

Muri Raporo yasohowe na Transparency Rwanda ya Global Corruption Barometer 2013, iravuga ko ku Isi ruswa ikomeje kwiyongera muri rusange. Kuko ngo nibura umuntu umwe kuri bane yatanze ruswa ku rwego rwa Leta mu mwaka ushize nk’uko bitangazwa n’ubu bushakashatsi bwakozwe ku bihugu 95 ku Isi. Transparency Rwanda mu kiganiro yahaye abanyamakuru kuri uyu wa kabiri ivuga ko umwanya u Rwanda ruriho utavuze ko ruswa mu gihugu idahari.

Kuri bimwe mu bihugu bya Africa ruswa ngo iri hejuru cyane. Sierra Leone niho ikaze kuko ababajijwe 84% bemeza ko batanze ruswa. U Rwanda, nicyo gihugu muri Africa 13% by’ababajijwe bemeza ko batanze ruswa, nicyo kigero kiri hasi mu bihugu byakozweho ubu bushakashatsi muri Africa.

Transparency Rwanda ivuga ko ruswa mu Rwanda yagabanutse kubera imbaraga zashyizweho na Leta mu gukumira no guhana ibyaha bya ruswa.

Transparency Rwanda mu kiganiro yagiranye n’abanyamakuru kuri uyu wa 09 Nyakanga, yavuze ko ababajijwe mu Rwanda bemeza inzego z’ubutabera na Police arizo zivugwamo cyane kwaka ruswa, ariko ngo ziri ku kigereranyo cya 2%, mu gihe ku Isi muri rusange ziri ku kigero cya 4%.

Apollinaire Mupiganyi, umuyobozi wa Transparency Rwanda avuga ko Abanyarwanda bagera kuri 95% bishimira imbaraga zishyirwa mu kurwanya ruswa mu Rwanda  biciye mu nzego za polisi, Umuvunyi, Ubugenzacyaha n’ubushinjacyaha.

Ibi ngo nibyo byatumye u Rwanda rwisanga ahadakabije muri ruswa ku Isi, ndetse n’aheza ugereranyije n’ibindi bihugu byose bya Africa.

Mupiganyi ati “Inzego zishinzwe ku rwanya ruswa mu Rwanda zimaze kwiyubaka niyo mpamvu iyi raporo ishyira u Rwanda ku mwanya utari mubi. Ariko ntibivuze ko ruswa idahari. Transparency Rwanda igerageza gukorana n’inzego mu kurwanya ruswa, umuturage iyo adutungiye agatoki aho bamwaka ruswa turabikurikirana. Ubu bufatanye buri mu bituma ruswa igenda igabanuka.“

Ku Isi, ibihugu bitarangwamo na ruswa ikabije ni Denmark, Finland, Japan na Australia aho ibarwa ku kigero cya 1% gusa by’abemera ko bayitanze.

Huguette Labelle, umunyacanada uyobora Transparency International avuga ko ubu bushakashatsi buvuga ko kwibeshya kuri bwo kwaba nibura kubarirwa kuri 3%, kuri buri gihugu abantu nibura 1 000 ngo nibo babajijwe.

Abarenga 1/2 cy’abantu babajijwe na Transparency International, umuryango ukorera i Berlin mu Ubudage, bavuga ko ruswa yarushije kwiyongera ku Isi mu myaka ibiri ishize.

Minisitiri w’ubutegetsi bw’igihugu Musoni James yatangarije abanyamakuru ko impamvu ituma ruswa igabanuka mu Rwanda ari umurongo wa politiki u Rwanda rugenderaho, udaha intebe ruswa kandi uhana ufashwe wese ayaka cyangwa ayitanga.

Musoni yagize ati “Hashyizweho inzego nk’Umuvunyi, gahunda zo kugenzura imitungo y’abakozi ba Leta, ubugenzuzi bw’imikoreshereze y’imari ya Leta n’ibindi, ibi byose bigamije gukumira ruswa ahanini kuko ni imungu y’iterambere tugamije.“

Daddy Sadiki Rubangura
UM– USEKE