Rusizi: Umugabo ‘yishe’ sewabo na nyirasenge abatemaguye bombi

Mu ijoro ryo kuri uyu wa mbere Gashyantare mu kagali ka Nyamihanda mu murenge wa Butare umugabo witwa Nakuzeyezu Potien w’imyaka 27 araregwa ko yateye urugo rwa sewabo ahasanga na  nyirasenge bombi abica urubozo abatemaguye.

Abaturanyi b’uyu muryango babwiye Umuseke ko abenshi babimenye muri iki gitondo.

Ngo uyu mugabo yari amaze igihe aba i Burundi ariko mbere akaba yarahoraga yishyuza aba bene wabo isambu, kuva yagaruka ngo buri munsi ngo hagati yabo hari amakumbirane.

Aba baturanyi bavuga ko ejo Tumenyanakuze yari yiriwe asirisimba muri uru rugo rwa se wabo ariko batari bazi umugambi afite.

Janvier Habiyaremye Umunyamabanga Nshingwabikorwa w’umurenge wa Butare yabwiye Umuseke ko bamenye iby’uru rupfu amakuru bayahawe n’umuyobozi w’Umudugudu.

Habiyaremye ati “ubu ndi mu nzira njyayo kuko ni kure cyane, namenye ko yatemye se wabo witwa Nangwanabose Benedicto w’imyaka 57 na nyirasenge  witwa  Suzan Mukamudenge  w’imyaka 52. Ngo bari bafitanye amakimbirane ashingiye ku masambu.”

Tumenyenakuze ushinjwa gutema aba bene wabo bya bugufi yatawe muri yombi ku bufatanye n’abaturage ariho agerageza guhunga, ubu afungiye kuri Station ya Police Nyakabuye.

Benewabo yishe bo bajyanywe ku bitaro bya Mibilizi.

Abaturanyi babwiye Umuseke ko uwitwa Augustin Barijyanese akaba se w’uyu musore wishe abavandimwe be nawe yahise abura, kugeza ubu ngo bakeka ko yaba yabimenye agahunga ngo nawe atamwica.

Francois Nelson NIYIBIZI
UM– USEKE.RW/Rusizi