Rusizi International University: Bakomeje kwiga nubwo bahagaritswe

Bamwe mu banyeshuri biga muri iyi kaminuza iri mu mujyi wa Kamembe babwiye Umuseke ko bahangayikishijwe no kwiga mu ishuri ryahagaritswe na Minisiteri y’Uburezi. Ubuyobozi bw’iyi Kaminuza bufite inama yihutirwa n’abayigamo kuri uyu wa gatandatu.

Ibaruwa ya Minisitiri w’Uburezi yo kuwa 11 Werurwe yahagaritse iyi Kaminuza nyuma y’igenzura ryayikorewe bagasanga itujuje ibipimo bisabwa. Bayisaba guhagarika ibikorwa ikabikosora nibura mu gihe cy’amezi atandatu.

Iyi baruwa yavugaga ko kudakora ibisabwa muri iyi baruwa mu gihe bahawe bishobora kuviramo Kaminuza gufungwa burundu.

Amasomo muri iki cyumweru yarakomeje muri iyi kaminuza, abanyeshuri bahiga ariko babwiye Umuseke ko impungenge ari zose.

Aba banyeshuri batifuje gutangazwa amazina, bavuga ko kuba ishuri ryabo ryarahagaritswe amezi atandatu ngo ribanze ritunganye ibisabwa ariko bagakomeza kwiga bibateye impungenge cyane.

Umwe muri bo ati “uyu munsi (kuwa gatanu) twabonye itangazo riduhamagara mu nama yihutirwa. Dufite impungenge cyane. Turatinya guhomba Kaminuza yacu nifungwa ariko no kwiga mu ishuri ryafunzwe nabyo ni ikibazo.”

Aba banyeshuri babwiwe ko ngo mu nama yo kuri uyu wa gatandatu bazasurwa n’abayobozi bavuye i Kigali.

Ubuyobozi bw’iyi Kaminuza ntiturashobora kubugeraho ngo bugire icyo butangaza ku biri muri Kaminuza mpuzamahanga ya Rusizi

Ibyemezo bya Minisiteri y’uburezi nyuma y’igenzura ryakozwe n’itsinda ry’abanyamahanga ryahagaritse Kaminuza zigenga zigera kuri enye ubu.

Kaminuza ya Gitwe yo yahise ishyira mu bikorwa umwanzuro wa Minisiteri y’uburezi guhera ejo hashize kuwa kane, abanyeshuri barenga 1 000 barataha.

Francois Nelson NIYIBIZI
UM– USEKE.RW