Ruhashya: Abaturage bigishijwe guhingisha imashini no kuhira imyaka

Kuri uyu wa kane, mu murenge wa Ruhashya mu karere ka Huye, Minisiteri y’ubuhinzi n’ikigo cy’ubuhinzi RAB bahatangirije icyumweru cy’ubuhinzi bukoresheje ikoranabuhanga aho beretse abaturage uko bahingisha imashini no kuhira imyaka bakoresheje amazi bafite, byose hagamijwe kongera umusaruro w’ibyo bahinga.

Aba baturage ariko bavuga ko ibyo beretswe ari byiza ariko nta bushobozi bafite bwo kugura izi mashini.

Felicien Ndayisaba umuhinzi wo muri Koperative TUZAMURANE mu gishanga cya Ruvungirana, avuga ko uburyo bwo gukoresha imashini zihinga ari bwiza ariko akavuga ko zihenze cyane.

Ati “niba bishoboka muzazidukope tujye dusarura tubishyura buhoro buhoro kuko kuzigura ntabushobozi dufite”.

John Bosco Taremwa umukozi wa RAB ku rwego rw’igihugu yakanguriye abahinzi ko ubu buryo aribwo buzabafasha kurushaho kubona umusaruro mwinshi kandi mu gihe gito, abasaba kwibumbira mu matsinda yo kubafasha kubona ubushobozi bwo kugura cyangwa gukodesha izi mashini.

Taremwa ati “uwakoresheje ubuhinzi bukoresheje ikoranabuhanga atanga amafaranga make kandi mugihe gito, mugihe ukoresha isuka ahera mu nzira ahingisha gato gato kandi bakamuhingira nabi, amafaranga wakoresha ugura ibi bikoresho akugarukira mu mwaka umwe kandi ugasagura n’andi ku ruhande yo gukora ibindi bikorwa”.

Mutwarasibo Cyprien umuyobozi w’akarere wungirije ushinzwe iterambere ry’ubukungu mu karere ka Huye yibukije abahinzi ko badakwiye gutegereza inkunga ngo kuko kuba igishanga cyaratunganijwe ari inkunga ikomeye yatanzwe na Leta, bityo abasaba kwishakamo imbaraga bakabasha kwita ku myaka yabo.

Iki gikorwa kigamije gufasha abahinzi gukoresha uburyo bugezweho harimo guhingisha imashini no kuhira imyaka hakoreshejwe imashini zabugenewe cyateguwe nyuma yo kubona ko ibihe by’ihinga bigenda bihinduka, bityo abahinzi bagashishikarizwa gukoresha ibikoresho by’ikoranabuhanga mu buhinzi mu rwego rwo kunoza no kongera umusaruro.

Christine NDACYAYISENGA
UM– USEKE.RW/Huye