Ruhango: Abunzi baranenga ko bagenerwa Mituelle nke

Abunzi bakorera mu murenge wa Ruhango akarere ka Ruhango barasaba Leta ko ikwiye kubongerera umubare w’ubwisungane mu kwivuza “Mituelle”, kuko izo bagenewe ari nke mu gihe bo batabona umwanya wo gushaka amafaranga yo kuzigura kuko birirwa biruka inyuma y’imanza z’abaturage.

Aba bunzi bo bavuga ko Leta yari yarabemereye kujya ibaha mitiweli z’abantu batanu gusa, bo basanga zidahagije kuko hari igihe umwunzi umwe aba afite umuryango w’abantu batanu.

Abunzi bavuga ko barwara bagahera mu nzu kandi bitakagombye kuko Leta yari yarabemere kubagurira amakarita y’ubwisungane mu kwivuza.

Ubwisugane bahabwa usanga bwemerera kuvuza abantu batanu gusa nkuko Yohana Nyaminani umwunzi ukorera mu kagali ka Gikoma abivuga.

Uyu avuga ko amakarita atanu bahabwa atabanyura kuko umwanya munini bawumara bakemura imanza z’abaturage ahaboneka imanza nyinshi zirimo iz’izungura, iz’umurage ndetse n’izubutaka.

Ati: “nta mwanya tubona wo kwita ku by’ingo zacu ngo tube twabona amafaranga yo kugurira umuryango wacu ubwisungane mu kwivuza”

Innocent Habimana ni umukozi wa minisiteri y’Ubutabera uhuza inzego z’abunzi n’abaturage mu karere ka Ruhango, avuga ko ubwisungane abunzi bemerewe na Leta ari ubwisungane bw’abana batatu hakiyongeraho n’izababyeyi babo babiri kandi ko zizira igihe.

Gusa kuba ngo batangira Mitiweli abantu bake mu muryango, Habimana avuga ko agiye kubikorera ubuvugizi kugira ngo abunzi bakomeze gukora akazi kabo neza, kuko ngo kugeza ubu urwego rw’abunzi rufite akamaro kanini mu gukemura ibibazo by’abaturage.

UM– USEKE.COM