Rubavu: Abaturiye ikibuga cy’indege bamwe basenyewe

Ubuyobozi mu karere ka Rubavu kuri uyu wa mbere bwatangiye igikorwa cyo gusenyera bamwe mu baturage bubatse ahazagurirwa ikibuga cy’indege cya Gisenyi. Ubuyobozi buvuga ko abasenyerwa ari abubatse mu buryo bunyuranyije n’amategeko. Abari gusenyerwa bamwe bavuga ko bafite kandi beretse ubuyobozi ibyangombwa bahawe bajya kubaka.

Aba ni abaturage baturiye imbago z’ikibuga cy’indege mu murenge wa Rubavu Akagali ka Byahi mu midugudu irimo Isangano na Rurembo.

Abaturage basenyewe babwiye Umuseke ko batazi impamvu basenyerwa mu gihe ngo bafite ibyangombwa bahawe bajya kubaka.

Ubuyobozi bwo buvuga ko abasenyerwa ari abubatse nta burenganzira bahawe naho abandi nabo bagomba kwimurwa aha bakaba bagitegereje guhabwa ingurane ngo bimuke.

Ikibazo cy’abatuye ahazagurirwa ikibuga cy’indege cya Gisenyi kimaze igihe kinini, abahatuye barabujijwe kugira icyo aricyo cyose bongera gukora ku nzu cyangwa imirima yabo mu gihe ngo babaruriwe bategereje ingurane ngo bimuke.

Iki kibazo kikaba cyaramanuye Inteko Ishinga Amategeko umutwe w’Abasenateri wohereje intumwa kuganira n’abaturage n’ubuyobozi kuri iki kibazo mu minsi yashize. Bakumvikana ko ibyo kubishyura bagiye gusaba bikihutishwa.

Clarisse Imanizabayo Umunyamabanga Nshingwbaikorwa w’Umurenge wa Rubavu yemeza ko abaturage basenyewe ari abubatse mu buryo bunyuranyije n’amategeko.

Aba basenyewe ariko bo bakavuga ko bamaze igihe kinini batuye aha kandi bahubatse bafite ibyangombwa.

Ku kibazo cy’ingurane ubuyobozi bw’Umurenge bwijeje abatuye aha ko bitarenze ukwezi kwa cyenda uyu mwaka bazaba bishyuwe.

Patrick MAISHA
UM– USEKE.RW/Rubavu