RCS yasabwe kwita ku miryango y’abari abakozi bayo bazize Jenoside

Kigali – Abakozi 13 bakoreraga amagereza nibo babarwa kugeza ubu bishwe muri Jenoside yakorewe Abatutsi, mu muhango wo kubibuka kuri uyu wa 17 Mata Minisitiri w’umutekano mu gihugu yasabye ko urwego ubu rushinzwe imfungwa n’abagororwa rukwiye kwita ku miryango itishoboye y’abo bakozi yasigaye.

Muri uyu muhango wabereye ku kicaro cy’urwego rw’igihugu rushinzwe imfungwa n’abagororwa, Minisitiri Sheikh Musa Fazil Harerimana yasabye ko abakozi bagera ku 2 500 bakorera uru rwego rwa RCS mu bihe nk’ibi buri wese atanze amafaranga 1 000 bagafasha imiryango y’abasizwe n’abo bibuka ubu cyaba ari igikorwa gikomeye.

Hon Chantal Kabatsinga umudepite mu Nteko Ishinga Amategeko umugabo we yakoraga muri gereza ya Kibungo yicwa, yavuze ko Abatutsi bakoraga mu magereza bari bacye ariko batotezwaga kenshi bazizwa uko bavutse.

Muri uyu muhango wabanjirijwe n’amasengesho y’abanyamadini abayobozi batandukanye bamaganye ibyabaye mu 1994 banamagana abahakana bakanapfobya Jenoside yakorewe Abatutsi.

Minisitiri Harerimana yavuze ko u Rwanda ruri kubaka igihugu kidashobora gusubira mu mwijima ushingiye ku macakubira kuko abato bari kwigishwa kwiyumvamo ubunyarwanda kurusha amoko.

Ati “Ushaka kongera kwimakaza ivanguramoko n’amacakubiri mu Rwanda ntabwo azabishobora, hari gahunda ya ‘Ndi Umunyarwanda’ igamije kubanisha abanyarwanda”

Ubutumwa butandukanye bwatangiwe muri uyu muhango bwagarutse cyane ku kurwanya ivanguramoko ryubakiweho na Leta za mbere ya 1994 rikageza kuri Jenoside yakorewe Abatutsi yabanje gutegurwa.

Jean Paul NKUNDINEZA
UM– USEKE.RW