Rayon yasabye gukin na Etincelles bisubikwa kuko ibura abakinnyi batatu

Mu mpera z’iki cyumweru harakomeza imikino yo ku munsi wa 18 wa shampiyona y’u Rwanda, gusa umukino wari guhuza Rayon sports na Etincelles ushobora kutazaba kuko Rayon yasabye ko usubikwa.

Nyuma yo kunganya na AS Kigali, umutoza Masudi Djuma wa Rayon Sports yatangaje ko badashobora gukina na Etincelles kuri iki cyumweru badafite abakinnyi babo batatu; Nshuti Savio, Djabel Imanishimwe na Muhire Kevin bari mu ikipe y’igihugu iza kujya muri Uganda gukina umukino wo kwishyura wo gushaka itike y’igikombe cya Afurika cy’abaterengeje imyaka 20.

“Nasabye ko umukino wo ku cyumweru wasubikwa, mfite abakinnyi batatu mu ikipe y’igihugu y’abato kandi FIFA iteganya ko iyo ‘Club’ ibishatse idakina umukino wayo. Sinavuga ko abo basore ari kamara ariko ndabakeneye muri rugendo turimo.”- Masudi Djuma. Utoza Rayon sports.

Iyi kipe y’abatarengeje imyaka 20 irahaguruka mu Rwanda kuri uyu wa kane ijya i Kampala muri Uganda mu mukino wo kwishyura uzaba kuwa gatandatu tariki ya 23 Mata 2016 kuri Mandela National Stadium.

Umukino ubanza wahuje ibihugu byombi mu Rwanda, Amavubi U-20 yanganyije na Uganda Hippos igitego 1-1.

Iyi mikino ikaba iri mu rwego rwo gushaka itike y’igikombe cya Afurika cya 2017 mu batarengeje imyaka 20, irushanwa rizabera muri Zambia mu mwaka utaha.

Ikipe izatsinda hahati y’u Rwanda na Uganda, izahura na Misiri mu cyiciro gikurikira.

Rayon Sports yo ikaba ejo yaravuye ku mwanya wa mbere nyuma yo kunganya na AS Kigali maze APR FC yari imaze gutsinda Mukura ihita yifatira umwanya wa mbere.

Roben NGABO
UM– USEKE.RW