Rayon Sports yatsinze ibitego 11 mu mikino itatu, ikizere ni cyose ku gikombe

Iminsi ine nyuma yo kunyagira APR FC, Rayon Sports yatsinze Rwamagana City 4-1, bituma Masudi Djuma uyitoza avuga ko abona igikombe kibari mu biganza. Ni nyuma yo gutsinda ibitego 11 mu mikino itatu iheruka.

Rayon sports muri iyi week end yatsinze Rwamagana City 4-1, byatsinzwe na Savio Nshuti Dominique, Manishimwe Djabel na bibiri bya Ismaila Diarra. Igitego cya Rwamagana cyatsinzwe na Jean de Dieu Nyabyenda.

Nyuma y’uyu mukino, Masudi Djuma yabwiye abanyamakuru ko abona igikombe kiri mu maboko yabo.

“Iyo utsinze abo muhanganye, APR FC, Mukura VS na Police birumvikana ko ikizere cyo gutwara igikombe kizamuka. Aho bigeze ubu, tutagitwaye, nitwe twaba twirangayeho.” – Masudi Djuma utoza Rayon sports

Nubwo ikizere cyazamutse, cyane ko  abasore be bamaze gutsinda ibitego 11 mu mikino itatu iheruka (bitatu batsinze Police FC, bine batsinze APR FC, bine batsinze Rwamagana City),  ngo Masudi abona haracyari byinshi byo gukora.

Masudi yakomeje agira ati: “Gukina imikino yegeranye cyane gutya, birumvikana ko biba bitoroshye. Abakinnyi batangiye kugaragaza umunaniro, kandi shampiyona ikibura imikino umunani yose. Njye nk’umutoza ni njye ugomba gushaka igisubizo. Haracyari akazi gakomeye.”

Rayon Sports ubu isigaje imikino umunani, ikomeye muri yo harimo iyo bazakina na Bugesera i Nyamata kuri uyu wa gatatu, AS Kigali, Kiyovu Sports, Etincelles(match y’ikirarane), kujya i Rusizi kwa Espoir no kujya i Rwamagana kwa Sunrise.

Indi mikino yabaye mu mpera z’iki cyumweru:

Kuwa gatanu tariki 6 Gicurasi 2016

Musanze Fc 3-1 Bugesera FC
Marines Fc 1-1 Amagaju Fc

Kuwa gatandatu tariki 7 Gicurasi 2016

Rayon Sports 4-1 Rwamagana City
Sunrise FC 1-2 APR FC
Gicumbi FC 0-3 Police FC
Etincelles 2-0 SC Kiyovu
AS Muhanga 1-3 Mukura VS

Ku cyumweru tariki 8 Gicurasi 2016

AS Kigali 2-0 Espoir FC

Rayon Sports ubu isigaje imikino umunani;
Kujya i Nyamata gukina na Bugesera
AS Muhanga
Amagaju,
Kiyovu Sports,
Etincelles(match y’ikirarane),
kujya i Rusizi kwa Espoir
Kujya i Rwamagana kwa Sunrise
Bazasoreza bakina na Musanze FC mu kigo cya Nyakinama kuko Stade Ubworoherane iri gusanwa

Roben NGABO
UM– USEKE.RW