Rayon Sport yahawe isomo na Isonga FC kuri 3-1

Ikipe ya Rayon Sport yongeye kubura amanota  atatu mu mukino wayihuje kuri uyu wa gatandatu n’ikipe y’Isonga kuri Stade de Kigali i Nyamirambo, umukino ukaba warangiye Isonga itsinze ibitego 3-1.

Wari umukino w’ikirarane kugirango ikipe y’Isonga FC yinjijwe muri shampionat nyuma ibashe kwegera imikino 11 izindi zimaze gukina.

Ishyaka ryagaragaye ku mpande zombi kuva umukino ugitangira, ku munota wa 24 w’igice cya mbere, Faruk Ruhinda yabonye igitegoo cya mbere cy’Isonga ku makosa ya ba myugariro Ndayisaba Floribert na Nshimiyimana Iddy ba Rayon Sport.

Ku munota wa 44, umunyezamu Juma Mpongo ntiyabashije gufata umupira yari aherejwe n’umutwe na myigariro Ndayisaba Floribert maze bituma igice cya mbere kirangira ari 2-0.

Nubwo mu gice cya kabiri Bokota Labama yaboneye Rayon Sport igitego ku munota wa 67, ndetse aba Rayon bakibwira ko bagiye kwishyura iyi kipe y’abasore bato, amahirwe yabo yarangijwe na Faruk Ruhinda nanone wacenze ba muyugariro ba Rayon Sport agatera ishito umunyezamu wari wasimbuye Juma Mpongo atamenye aho rinyunze biba 3-1 ari nako byarangiye.

Aya makipe yombi ni ubwambere yari ahuye mu mateka yayo, kuva Isonga yashingwa mu mpera z’umwaka wa 2011.

Umutoza Ntagwabira wa Rayon Sport akaba ngo abona bakinnye ariko intsinzi igatwara ikipe y’Isonga. Jean Marie Ntagwabira ntarava ku izima ryo kuba yakwegukana igikombe cya shampiyona uyu mwaka.

Ntagwabira ati: “birambabaje cyane gutsindwa n’aba bana twakinnye dushaka itsinzi ariko biranga. Ntidukuye amaso ku gikombe, gusa bizadusaba gukoresha ingufu nyinshi mu mikino itaha”.

Naho Eric Nshimiyimana utoza Isonga FC ati: “Twagiye dutsindwa ibitego mu mikino yabanje. Nyuma natwe dutangira kunganya no gutsinda igitego kimwe, none dutangiye gutsinda ibitego birenze kimwe. Tugomba gutangira kwitwara neza ndetse amakipe arangaye igikombe twagitwara.”

Iyi nsinzwi ya Rayon Sport itumye iguma ku mwanya wa 5 ndetse abenshi bakaba batangiye kwibaza ku mpamvu zihishe inyuma yo kutitwara neza ku ikipe ifatwa nk’izikomeye mu Rwanda.

Ku rutonde rw’agateganyo rwa shampionat Isonga FC yazamutse Rayon iguma aho yari iri

NO      TEAM              P         W        D         L          F          A         GD      PTs

01        APR FC          11        7          3          1          19        9          10        24

02        MUKURA      11        7          2          2          14        8          6          23

03        POLICE FC    10        6          3          1          16        4          12        21

04        KIYOVU        11        6          3          2          16        12        4          21

05        RAYON S      10        5          4          1          16        9          7          19

06        ETINCELLES            11       4          6          1          14        9          5          18

07        LA JEUNESSE 10     4          1          5          13        14        -1         13

08        AMAGAJU    11        3          2          6          10        18        -8         11

09        ISONGA FC  9          2          4          3          10        10        0          10

10        MARINES      11        3          1          7          9          14        -5         10

11        NYANZA FC 11        1          3          7          6          12        -6         6

12        ESPOIR FC    11        1          3          7          9          20        -11       6

13        AS KIGALI   10        1          3          6          5          16        -11       6

HATANGIMANA Ange Eric
UM– USEKE.COM