Rayon nyuma y’imikino 5 idatsinda, uwa 6 yanganyije na Police FC

Muhanga: Ikipe ya Rayon Sports yari imaze imikino itanu itabasha kubona amanota atatu, yongeye kunganya mu mukino wa 12 wa Shampiyona y’Icyiciro cya mbere mu Rwanda aho yakinaga n’ikipe ya Polisi FC banganya 0-0 kuri uyu wa kabiri tariki 6 Mutarama 2015.

Amakipe yakinnye neza, ariko Rayon Sports yari ifite igihugunga n’igitutu cyo gushaka instinzi ku ikipe ya Polisi iyiri imbere dore ko ari iya gatatu mu gihe Rayon ari iya kane.

Igice cya mbere cyarangiye amakipe yombi anganya 0-0.

Igice cya kabiri Rayon Sports yarushije Police FC, nyuma y’aho imvura yari ibaye nyinshi. Izo mbaraga Rayon Sports yari ifite, zatumye ibasha kubona imipira y’imiterekano, ariko kuyinjiza mu izamu birananirana, kuko yase yagonze umutambiko w’izamu.

Umukinnyi, Sina Jerome rutahizamu wavuye muri Polisi FC ajya muri Rayon Sports mu mwaka ushize, yaje gutsinda igitego nyuma gato y’uko yaragonganye n’umuzamu Emery Mvuyekure ariko umusifuzi Isa Kagabo avuga ko habaye ikosa.

Muganza Issac, undi rutahizamu wa Rayon Sports yaguye mu rubuga rw’amahina, abenshi mu bafana ba Rayon bibwira ko ari penaliti ariko, umusifuzi atanga ikarita y’umuhundo kuko Muganza yigushije.

Andy Mfutira, umutoza wa Rayon Sports wari ufite inyota yo gutsinda ariko akabona ko byanze, yagiye mbere y’uko umukino urangira ntiyabasha kuvugana n’abanyamakuru.

Gusa, umwungiriza we, Sostene Habimana yabwiye abanyamakuru ko bakinnye neza babona amahirwe ya penaliti ariko ngo bayibuze, ibyo yavuze ko ari akazi k’abasifuzi, yavuze ko mu gihe kiri imbere bagiye gukomeza kubaka ikipe ya Rayon Sports.

Umutoza wa Polisi FC, Kasa Mbungo yavuze ko ari ubwa mbere abonye Rayon Sports ikina iri hamwe kuva shampiyona itangiye. Yavuze ko Polisi FC itarushijwe ngo ahubwo yakinishije abakinnyi benshi bavuye mu mvune.

Mu yindi mikino yabaye kuri uyu wa kabiri:

Etincelles FC 0 – 0 Mukura VS

Espoir FC 1 – 0 Marine FC

Musanze FC 1 – 1 Amagaju FC

APR FC 2 – 0 Isonga FC

Imikino iteganyijwe kuri uyu wa gatatu:

Gicumbi FC 1 – 0  AS Kigali

Kiyovu Sport 1 – 1 SunRise

NKURUNZIZA Jean Paul
UM– USEKE.RW