Rayon na APR FC zidahari shampiyona irakomeza, As Kigali VS Police FC

17 Gashyantare 2015- Shampiyona y’icyiciro cya mbere mu Rwanda ku munsi wayo wa 17 irakomeza, ikipe y’Abanyamujyi As Kigali n’iy’abashinzwe umutekano Polisi FC bazahura mu mukino watangiye kuvugisha abatoza Eric Nshimiyimana na Casa Mbungo.

Ni umukino uhatse indi y’umunsi wa 17 wa shampiyona y’icyiciro cya mbere hano mu Rwanda ahanini ugendeye ku buryo aya makipe yombi ahagaze muri iki gihe. As Kigali iri ku mwanya wa kabiri muri shampiyona n’amanota 28 mu gihe ikipe ya Police Fc iri ku mwanya wa 4 n’amanota 24.

Umutoza Casa Mbungo utoza ikipe ya Police FC yasimbuwe n’umutoza Eric Nshimiyimana mu ikipe ya AS Kigali, Nshimiyimana na we akaba yari yarasimbuye mu ikipe y’igihugu Amavubi na Casa Mbungo. Ibi bituma urwego rw’uyu mukino rujya hejuru akenshi kubera ko buri wese aba ashaka kwereka mugenzi we ko amurusha.

Mu kiganiro na Umuseke umutoza Eric Nshimiyimana yatangaje ko kuri ubu shampiyona igeze ahakomeye, ariko we n’ikipe ye biteguye gukora neza ngo bakomeze gusatira APR FC ifite umwanya wa mbere muri Shampiyona.

Yagize ati “Ubu turi ku mwanya wa kabiri birashoboka ko twanajya ku mwanya wa mbere, biracyashoboka, icyo dushyize imbere ni ugukomeza kwitwara neza ngo turebe ko twafata APR FC.”

Casa Mbungo Andre utoza ikipe ya Police FC, aherutse kwikoma imisifurire ya hano mu Rwanda gusa akavuga ko nubwo yatakaje abakinnyi benshi kubera ikibizo cy’ubunyamahanga, ariko afite ikipe nziza ari kubaka kandi ifite ubushobozi bwo kwitwara neza.

Yagize ati “Ubu turi gutegura ikipe nziza y’igihe kirekire, nabuze abakinnyi benshi kubera ikibazo cy’ubunyamahanga kandi bitunguranye, imvune na zo ntizanyoroheye ariko ubu ikipe ni nziza kandi tuzagerageza kwitwara neza kuri uyu mukino.”

Uyu mukino ikipe ya As Kigali izawakirira ku kibuga cya Kicukiro, amakipe yombi yanganyije mu mukinoubanza.

Uko amakipe yose azahura ku cyumweru

Espoir vs Musanze 15h30 Stade ya Kamarampaka (Rusizi)

AS Kigali vs Police 15h30   Stade ya Kicukiro

Kiyovu Sports vs Amagaju 15h30 Stade ya Mumena

Sunrise vs Mukura VS 15h30 Stade Rwamagana

Gicumbi vs Isonga 15h30   Stade Gicumbi

NKURUNZIZA Jean Paul
UM– USEKE.RW