Rayon irasura Mukura VS mu mukino ufite icyo uvuze ku gikombe

Kuri uyu wa gatatu tariki 27 Mata 2016 shampiyona y’u Rwanda irakomeza ku munsi 19. Umukino ukomeye urahuza Mukura VS iza kwakira Rayon sports kuri stade Huye. Izi ziri guhatana mu zishaka igikombe.

Mukura VS igiye kwakira Rayon Sports kuri stade Huye, nyuma y’imyaka itandatu (6)  kuko byaherukaga muri 2011 iyi stade itaratangira kuvugururwa.

Amakuru ava muri Mukura VS, aremeza ko iyi kipe izakina uyu mukino idafite Niyonzima Ally, bivugwa ko yatorotse ubu ari muri Uganda na Emmanuel Ngama udaheruka mu myitozo.

Gusa Mukura izaba yagaruye Muhadjiri Hakizimana wababariwe, nyuma yo kumara iminsi adakora imyitozo kubera ibihano yafatiwe bivuye ku myitwarire mibi nk’uko byavuzwe n’umutoza Okoko Godfroid.

Ku rundi ruhande mu rwego rwo kwitegura uyu mukino, Rayon Sports yagiye gukorera umwiherero mu karere ka Muhanga.

Amakuru dukesha Masudi Djuma utoza iyi kipe, aremeza ko abakinnyi bose biteguye uyu mukino, usibye Ismaila Diarra ufite amakarita abiri y’umuhondo.

Mu mikino 21 iheruka guhuza amakipe yombi, Mukura VS yatsinzemo ine, Rayon Sports itsinda 15  banganya itatu.

Rayon sports niyo yatsinze umukino uheruka guhuza impande zombi, 2-0 bya Davis Kasirye na Kwizera Pierro, tariki 23/10/2012 nibwo MVS iheruka gutsinda Rayon Sports.

Indi mikino iteganyijwe kuri uyu wa gatatu:

Bugesera FC vs APR FC (i Nyamata)
Espoir FC vs Amagaju FC (i Rusizi)
Police FC vs Rwamagana (Stade ya Kigali)
Kiyovu sports vs Musanze (Stade Umumena)
Etincelles Fc vs Sunrises (Stade Umuganda)
AS Muhanga vs Marine FC (Muhanga)
Gicumbi vs AS Kigali (i Gicumbi)

Roben NGABO
UM– USEKE.RW