Rayon irashaka kwisubiza igikombe cy’Agaciro. Mukura yakaniye

Aya makipe yombi yahuriye ku mukino wa nyuma w’iri rushanwa mu 2012, asanzwe ahangana mu Majyepfo kandi kuva uyu mwaka wa 2015 watangira nta yiratsinda indi. Uyu munsi ariko zigomba kwishakamo itsinda indi bwa mbere muri uyu mwaka. Ni mu mukino wa 1/4  uri buzihurize i Muhanga.

Muri uyu mwaka Rayon Sports na Mukura zanganyije ubusa ku busa mu mukino ubanza wa shampiyona ishize, zongera kunganya igitego 1-1 mu mukino wo kwishyura.

Kuri Rayon Sports uyu munsi, nta mpinduka nyinshi zitezwe ugereranyije n’ikipe yatsinze Amagaju ibitego 2-0 kuwa mbere, aho Rayon Sports iragendera cyane ku bakinnyi bashya yaguze biganjemo abavuye mu Isonga FC nubwo hari abafite ibibazo by’imvune nka: Mugenzi Cedrick wavuye muri Gicumbi, Muhire Kevin, Nshuti Dominique Savio na Rukundo Jean Marie Vianney.

Peter Otema na Kwizera Pierrot ntibaragera muri iyi kipe y’i Nyanza ndetse na Moussa Mutuyimana baherutse kugura ntarahagera.

Mukura VS nta bakinnyi benshi bashya ifite, ariko n’ikipe yo kwitondera kuko yari yatsinze Amagaju ibitego 4-0 mu mukino wabaye kuwa gatandatu w’icyumweru gishize.

Abakinnyi bo kwitegwa: Kasirye Davis (Rayon Sports) na Ciiza Hussein (Mukura VS)

Rayon Sports niyo ifite igikombe cy’iri rushanwa ubwo ryabaga mu 2012, ikaryegukana itsinze Mukura VS igitego 1-0 cya Kambale Salita Gentil.

Imikino ya 1/4 iteganyijwe uyu munsi:

Rayon Sports vs Mukura VS (Muhanga)

APR FC vs Police FC (Kicukiro)

Musanze vs Etincelles (Tam Tam)

AS Kigali vs Sunrise (Mumena)

UM– USEKE.RW