President Kagame na Museveni bafunguye umuhanda Mbarara-Gatuna-Kigali

Kuri uyu wa gatanu, mu muhango wo gufungura kumugaragaro umuhanda wasubiwemo wa Mbarara-Gatuna ugera n’i Kigali, President Kagame yabanje kuramutsa abagande bo mu majyepfo ya Uganda bari muri uyu muhango mu rurimi rwabo rw’ikinyankole.

Yabahaye indamukanyo z’uko abanyarwanda bamutumye ngo abifurize iminsi mikuru myiza y’impera z’umwaka.

President Kagame yashimiye President Museveni kuba yamutumiye gufungura uyu muhanda unahuza ibihugu byombi, yemeza ko uzagira akamaro ku bihugu byombi.

President Kagame yaboneyeho kwemerera Museveni ko we n’umuryango we bari busure Museveni n’umuryango we iwe muri iyi minsi mikuru.

Kuby’uyu muhanda, President Kagame yashimangiye ko uyu muhanda uzarushaho gufasha abawukoresha b’ibihugu byombi ndetse n’iby’aka karere kuko ubu umeze neza kurushaho.

Yasabye ko impande zombi zafata neza uyu muhanda, ukaramba, ugakomeza kubaha umusaruro.

President Kagame yashimiye European Union ku nkunga yatanze ngo uyu muhanda usubirwemo neza, ariko ko noneho ibihugu byombi aribyo bizimenyera ibyo kuwubungabunga.

Jean Paul Gashumba
UM– USEKE.COM