Polisi yerekanye imodoka yibwe n’ibindi bitemewe byafashwe muri Usalama II

Imodoka yo mu bwoko bwa Voiture Toyota Carina E yibwe mu gihugu cy’Ubuholandi, imiti ikoreshwa mu buhinzi, amafumbire, amavuta y’amamesa atujuje ubuziranenge, ibiyobyabwenge by’amoko anyuranye, biri mu byo Polisi yerekanye byafashwe mu gikorwa kiswe Usalama II.

ACP Tony Kuramba Umuyobozi wungirije w’ishami ry’Ubugenzacyaha, akaba anakuriye Polisi Mpuzamahanga (Interpol) mu Rwanda, yavuze ko ibikorwa bya Usalama II byakozwe mu bihugu 12 bigize akarere ka Polisi yo mu Burasirazuba bwa Africa (EAPCO) n’iyo muri Africa y’Amajyepfo (SAPCO), tariki ya 4-5 Kamena 2015.

Ibi ngo byakozwe mu kubahiriza imyanzuro y’abakuriye Polisi mu bihugu 20, aho biyemeje kurwanya ibyaha bijyana no gucuruza abantu, ibijyana n’ibiyobyabwenge, icuruzwa ritemewe ry’amabuye y’agaciro, ubujura bw’intsinga z’amashanyarazi, kurwanya iterabwoba n’abafasha mu ikorwa ry’ibi byaha.

Ibikorwa bya Usalama II kandi bishakisha kandi bikarwanya abacuruza intwaro ntoya n’abazikwirakwiza mu buryo butemewe n’amategeko, n’abantu bangiza ibidukikije by’umwihariko inyamaswa n’ibimera biri mu marembera ku Isi.

Mu mukwabo wakozwe mu Rwanda hose kuri iyi tariki ya 4-5 Kamena, hafashwe ibiyobyabwenge bya kanyanga litiro 1 142, urumogi  ibiro 215 na mairungi amapaki 240, byose hamwe bifite agaciro k’amadolari ya Amerika 16 274$ (Frw 11 391 800).

Mu bindi byafashwe harimo imodoka yo mu bwoko bwa Toyota Carina E yibwe mu 2008 mu gihugu cy’Ubuholandi, imodoka yari itwaye ibiro 800 z’igiti cya Kabaruka (Umushikiri) kibujijwe gucuruzwa, amafumbire n’imiti bikoreshwa mu buhinzi ndetse n’amavuta y’amamesa atujuje ubuziranenge.

Mme Uwumukiza Beatrice umukozi wa Minisiteri y’Ubuhinzi ushinzwe ubuziranenge yavuze ko imiti yafashwe ifite inenge y’uko imwe yarangije igihe indi ikaba itemewe kuko ngo isigara mu musaruro w’ibihingwa ukaba watera ingaruka ku buzima ndetse uwo musaruro ntugire agaciro ku isoko mpuzamahanga.

Yasabye abaturage gushishoza igihe bagiye kugura ibintu ku isoko, kandi bakajya bagura ahantu hazwi ngo kuko MINAGRI ifite urutonde rw’imiti n’amafumbire byemerewe gukoreshwa mu buhinzi mu Rwanda.

CSP Celestin Twahirwa yabwiye abanyamakuru ko kuba mu bihugu 12 ibi bikorwa by’umukwabo byarakorewe rimwe ari uburyo bwo gukumira ko hari bamwe babihungiramo. Ikindi ngo bizafasha mu gusangira amakuru, kuko hari bimwe byafatiwe aha, bishobora kuzajya ahandi.

Twahirwa yagiriye inama abacuruzi kurangura ibintu byemewe kandi bakajya barangura ahantu hizewe bazi, kuko ngo hari benshi bafatanywe ibicuruzwa nk’imiti yo mu buhinzi ariko batari bazi ko ari imyiganano cyangwa itemewe.

Iyi modoka yafashwe, ngo hagiye gushakishwa nyirayo, igihe azaba atabonetse izashyirwa ku isoko itezwe cyamunara.

HATANGIMANA Ange Eric
UM– USEKE.RW