Police FC igiye gukina imikino ya gicuti n’amakipe yo hanze y’u Rwanda

Nyuma yo gutangaza Seninga Innocent nk’umutoza mushya Police FC yamaze gutangira imyitozo, igiye gukina imikino ya gicuti n’amakipe y’i Rubavu, n’i Goma muri DR Congo.

Umwaka w’imikino wa 2015-16 Police FC yabaye iya gatanu (5) muri shampiyona. Byatumye ubuyobozi bw’ikipe bwirukana abari abatoza bayo Cassa Mbungo Andre na Nshimiyimana Maurice bita Maso.

Basimbuwe na Seninga Innocent wavuye muri Etincelles, wungirijwe na Bisengimana Justin wavuye muri Gicumbi FC.

Ikipe ifite abakinnyi bashya; Ndayishimiye Celestin wavuye muri Mukura VS, Antoine Dominique Ndayishimiye wari rutahizamu wa Gicumbi FC, Mirafa Nizeyimana wari kapiteni wa Etincelles FC, umuzamu Nduwayo Danny bita  Barthez, Habimana Hussein bavuye muri Etincelles na Amini Muzerwa wavuye muri AS Kigali.

Nyuma y’imyitozo yo kuri uyu wa kabiri, umutoza mushya wa Police FC, Seninga Innocent yabwiye Umuseke ko bagiye gutangira gukina imikino ya gicuti harimo n’iyo bazakina n’amakipe yo DR Congo.

“Tumaze ibyumweru bitatu mu myitozo. Ndimo kugerageza guhuza imikikinire y’abakinnyi basanzwe aha, n’abakinnyi bashya twazanye. Navuga ko bigenda neza, ikibura ni imikino yo kugaragarizamo urwego bariho.

Ubuyobozi bwanyemereye kumfasha, mu minsi iri imbere tuzakorera umwiherero w’ibyumweru nka bibiri i Rubavu. Tuzakina n’amakipe yaho, tunakine n’amakipe y’i Goma ari ku rwego rwiza cyane nka AS Dauphins Noirs ndayizi, ifite abakinnyi beza cyane kandi yadufasha kwitegura shampiyona.”- Seninga Innocent

Iyi kipe yo muri DR Congo izakina na Police FC, abanyezamu bayo batozwa na Nkunzingoma Ramadhan wahoze akina mu Amavubi. Inarimo abakinnyi bazwi mu Rwanda nka; Jimmy Mbaraga, Thierry Kasereka (mukuru wa Fabrice Mugheni) Albert Nyumbayire na Abedi Mulenda.

Roben NGABO
UM– USEKE.RW