Police 0 – 3 APR ibyari byitezwe sibyo byabaye

Amahoro Stadium– Ku mukino wa 1/2 w’igikombe cya Primus Cup wahuzaga APR na Police, benshi bari biteze ko aya makipe aza guhangana bikomeye, utsinda akaza kuba yiyushye akuya. Siko byagenze kuko APR yatsinze ikipe ya Police  bitayigoye na gato ibitego 3 kubusa.

Muri uyu mukino wari wajeho abantu bake, kubera ikirere cyagushaga imvura, watangiranye ishyaka rikomeye, ndetse mu minota 15 yambere, umutoza w’ikipe ya Police asohorwa n’umusifuzi kubera kurenga urubuga yagenewe.

Umukino urangiye umutoza wa Police Goran Kopunovic yatangaje ko mu myaka 17 amaze atoza, yababajwe no kuba umuntu wambere (umusifuzi) yamututse ngo “Stupid” yarangiza akaba ari nawe usohorwa.

Nyuma yo kumusohora akajya muri tribune, umukino wakomeje, ikipe ya APR ibona igitego cyambere cyatsinzwe na captain wayo Karekezi Olivier ku mupira mwiza yari aterewe na Ndikumana Seleman (mushya).

Ku munota wa 29, ikipe ya APR yabonye ikindi gitego cyatsinzwe na Dan Wagaruka (mushya) nanone ku mupira mwiza (centré) watewe na Ndikumana Seleman, igitego cya gatatu nacyo cyakurikiyeho ku munota wa 39 kinjijwe na Mugiraneza J Baptiste bita Miggy, ku ikosa rya bamyugariro ba Police barimo Otieno Deo.

Mu gice cya kabiri, nubwo Police yabonye uburyo bwinshi bwo gutsinda, ntibyashobotse kubera akazi kanini kakozwe n’umuzamu Ndoli Jean Claude wakuyemo amashoti menshi ya Kagere Medi, Gashugi Abdul na Tuyisenge Jacques. Umukino warinze urangira ari ibitego bitatu bya APR ku busa bwa Police FC.

Umukino wari wabanjirije uyu, ni uwahuje La Jeunesse na AS Kigali, warangiye La Jeunesse isezerewe kuri Penalty 6 kuri 4.

Ibi bivuze ko ku munsi w’ejo ku cyumweru AS Kigali izakina na APR umukino wanyuma wa Primus Cup, zikazabanzirizwa na La Jeunesse na Police zizakinira umwanya wa gatatu kuri stade Amahoro.

Ikipe ya AS Kigali akaba ariyo yonyine yabashije gutsinda APR muri shampionat yashize.

Abakinnyi banjemo ku mpande zombi :

Police FC

Ganza Alex (bebe)  (Nyezamu)
Nkurunziza D’amour
Ndaka Fred
Otieno Deo
Nshimiyimana Aboubacar
Mike Sebaringa
Ndahayo Eric
Ibrahim Ndikumasabo
Gashugi Abdul Karim
Kagere Medi (captain)
Jacques Tuyisenge

APR FC

Ndoli J Calude (Nyezamu)
Ngabo Albert
Nshutinamagara Ismael (Kodo)
Alex Avera (umunya Angola mushya)
Iranzi Jean Claude
Johnson Bagore
Mugiraneza Jean Baptiste (Miggy)
Papy Fati (Umurundi mushya)
Seleman Ndikumana  (Umurundi mushya)
Dan Wagaruka (Umugande mushya)
Olivier Karekezi (captain) (nawe ni mushya)

UM– USEKE.COM