PGGSS igarukanye ibihembo bihebuje ku bahanzi 10

Irushanwa rimaze kumenyererwa mu Rwanda Primus Guma Guma Super Star 2014 rigiye kongera gutangira mu Rwanda aho tariki ya 15 Werurwe 2014 abahanzi bazatangira kujya gutaramira abafana ba muzika babasanze mu bice bitandukanye by’igihugu. Uzegukana iri rushanwa azahabwa miliyoni 24 z’amanyarwanda.

Kuri iriya tariki ya 15 Werurwe hazatangira haririmba abahanzi 15, muri aba bahanzi uyu munsi nibwo bazatoranywamo abahanzi 10 bazakomeza icyiciro cya nyuma cy’irushanwa.

Uzaviramo ku ikubitiro azahabwa amafaranga y’u Rwanda ibihumbi 500, uzamukurikira mu cyiciro gikurikiraho ahabwe 1 000 000, uzaviramo mu cyiciro cya gatatu azahabwa miliyoni n’igice, uzagera mu cyiciro cya kane akazahabwa miliyoni ebyiri.

Hakurikijwe uko bazagenda bavamo, uzavamo mbere azahabwa 500 000Frw, uzavamo nyuma ye ahabwe 1 000 000Frw, uzavamo mu munani bazaba basigaye ahabwe 1,500,000Frw, uzavamo hasigayemo barindwi azahabwa 2,000,000Frw, uzavamo hasigaye batandatu we azabona 2,500,000Frw, uzavamo hasigayemo batanu azahabwa 3,000,000Frw, uzavamo hasigayemo bane we azabona 3,500,000Frw naho uzavamo hasigaye batatu azahabwa 7,000,000Frw uzaba uwa kabiri azegukana 7,500,00Frw

Umuhanzi azaba uwa mbere we azahabwa miliyoni 24 z’amafaranga y’u Rwanda.

Mu gihe cya “Road Shows” abahanzi bakazaririmba by’umwimerere (live) imbere y’akanama gashinzwe gutoranya, aho amanota azatangwa ku buryo bukurikira ; akanama gatanga amanota gafite 80% naho gutora kuri SMS bifite amanota 20%.

Gutora kuri SMS, ushaka gutora yandika umubare (nomero) umuhanzi afite akohereza kuri 4343, iki gikorwa cyo gutora kikazatangira tariki ya 3 Gicurasi bisozwe ku ya 8 Kanama 2014.

Uyu mwaka kandi kuzenguruka mu Ntara ku bahanzi bizakorwa inshuro 19, bakazahera mu karere ka Rusisi mu Ntara y’Iburengerazuba.

Irushanwa ry’uyu mwaka kandi rizahemba buri muhanzi, mu bahanzi 10 bazaba bemerewe gukomeza irushanwa.

Mu mwaka ushize wa 2013, umuhanzi Rider Man uzwi nka Rusake ni we wegukanye irushanwa PGGSS.

Rutaganda Joel
ububiko.umusekehost.com