Perezida Buhari wa Nigeria yasubiye kwivuza i Londres

Ibiro bya Perezida wa Nigeria byemeje ko Muhammadu Buhari uyu munsi yasubiye kwivuza i London, gusa bivuga ko yagiye gukoresha isuzuma nyuma y’amezi abiri avuyeyo kuvurwa.

Ntibizwi neza igihe azamarayo, ibiro bye byavuze ko bizaterwa n’abaganga. Ubwo aherukayo yamaze iminsi 50 ari kwivurizayo.

Mu gihe adahari araba asigariweho na  Visi Perezida Yemi Osinbajo, wigaragaje neza kuri rubanda rwa Nigeria mu gihe yari yarasigariyeho Perezida Buhari.

Buhari we ubuzima bwe bukomeje gutera impungenge abaturage b’iki gihugu kinini kandi gituwe cyane muri Africa kuko bakeka ko arembye, mu gihe uruhande rwe rwakomeje kwerekana ko atarembye cyane.

Ubuzima bwa Perezida ntibwifashe neza mu gihe ubukungu bwa Nigeria nabwo bugenda bumera nabi nk’uko bivugwa n’ikinyamakuru Herald muri Nigeria.

Ubu biranugwanugwa ko kubera amagara Perezida Buhari ashobora kunanirwa kwiyamamariza manda ya kabiri mu 2019.

Perezida yasimbuye Umaru Yar’adua yapfuye ari ku buyobozi yishwe n’indwara itaratangajwe. AbanyaNigeria ubu bakaba bavuga ko badahabwa amakuru ahagije ku buzima bwa Perezida batoye.

Kuva mu kwezi kwa gatatu yava kwivuza i London, Perezida Buhari agaragara gacye cyane mu mahurira ya benshi ndetse inama nyinshi za guverinoma ziba rimwe mu cyumweru ntazitabira akenshi ngo akorera mu rugo.

UM– USEKE.RW