Penine Munyana yarushije bose muri Kaminuza, bamwitaga ‘umuhanga mu baswa’
* Yabuze bourse ya Kaminuza bituma ajya kwiga mu bitwa ‘abaswa’ batsinzwe
*Yize ‘short courses’ bitaga imyuga ngo ijyamo abaswa, arangizanya amanota atarigeze abona undi mbere
*Yahembwe kwiga ‘licence’ muri RTUC, ubu arangije ari uwa mbere nubwo bagenzi be babonaga
Penine Munyana afite imyaka 23, ubu arangije muri Kaminuza ya RTUC ari uwa mbere mu ishami ry’abigaga Business Infotmation Technology bose. Nyamara arangiza ‘secondaire’ yari yabonye amanota macye atamwemerera ‘bourse’ ya Leta cyangwa iya FARG kuko ari impfubyi ya Jenoside. Yahawe amahirwe yo kwiga ‘short courses’ bita ‘imyuga’ ayarangiza abonye amanota undi wese atigeze abona muri iyi gahunda, ahembwa kwiga ‘licence’ nayo arangije ari uwa mbere muri bose. Ibanga ngo ryari umuhate no kwereka abantu ko bamwibeshyeho ko ari umuswa.
Yabwiye Umuseke ko arangije ikiciro cya rusange cy’amashuri yisumbuye (tronc commun) yabaye uwa mbere aho yigaga, ariko mu kizamini cya Leta cyo gusoza amashuri yisumbuye yatsinzwe kuko babajijwe mu cyongereza yarize mu gifaransa, abona amanota 19 gusa.
Aya manota (19) ntiyamwemereraga kubona inguzanyo ya Leta y’abajya muri Kaminuza, habe yewe n’iya FARG y’ikigega gifasha abarokotse Jenoside yakorewe Abatutsi batishoboye kuko yari ku manota 21.
Gusa muri FARG bamubwiye ko amahirwe afite gusa ari ukwishyirirwa kwiga amasomo y’igihe gito yigisha umwuga (Short courses) y’amezi 18, aya ajyamo ahanini abatabonye amahirwe yo gukomeza muri Kaminuza ngo bakore ‘licence’.
Benshi aya mahirwe bayita ko ari ay’abaswa, batsinzwe, batagize amanota asabwa bakajya kwiga imyuga y’igihe gito.
Ati “Byatumye nanjye numva ntayishimiye, mu cyaro bavugaga ko tugiye kwiga imyuga kuko turi abaswa tudashoboye Kaminuza, bakavuga ngo turi incapable…ngo ntidushoboye.
Byatumye niha intego yo kubereka ko bibeshya, niga mbikunze ngamije gutsinda ngakuraho iyo myumvire y’uko abiga iyo myuga ari abadashoboye koko.”
Nyuma y’amezi 18 muri RTUC Munyana yarangije ari uwa mbere n’amanota 95%, amanota atarigeze abona undi munyeshuri muri iyi ‘program’ ya RTUC ifasha cyane abatagize amahirwe yo gukomeza Kaminuza n’abashaka ubumenyi mu masomo atandukanye y’ingirakamaro.
Nubwo n’ubusanzwe uwa mbere muri iyi program ahembwa, Munyana iyi kaminuza yamuhembye kumurihira agakomeza ‘licence’ mu ishami rya Business Information Technology.
Ati “Ngitangira nahise nkomeza kwitwara neza, abo twiganaga bakavuga ngo ni ibikabyo avanye muri short courses, bati yari umuhanga mu baswa…ariko njye ndavuga nti si byiza ko ntesha agaciro amahirwe mbonye, niga nshyizeho umwete ngo ntanakomeza kwitwa ko nari umuhanga mu baswa gusa.”
Mu kiciro giheruka kurangiza, Penine Munyana akaba yarabaye uwa mbere muri bose, ubu akaba azambara umwenda w’abarangije mu mpera z’uku kwezi.
Mu migambi ye harimo gukomeza ikiciro gikurikiyeho cya kaminuza, nubwo nta bushobozi afite ku ruhande rwe rwo kubimugezaho ariko ngo igishoro cye ni umuhate n’imigambi myiza afitiye imbere he ejo.
Munyana ashimira cyane abamufashije bose kugera aho ari ubu kandi agira inama urubyiruko yo kudacika intege mu byo bakora byose bakabikora babishyizeho umutima n’umuhate wose.
Uyu mwali akangurira abakobwa bagenzi be kutagira umwuga batinya mu gihe baba bagize amahirwe yo kuwiga ngo kuko nabo bashoboye nka basaza babo.
Callixte NDUWAYO
UM– USEKE.RW
English
30 Comments
Komereza aho kandi imbere ni heza
Iyi nkuru ninziza kandi irashimishije. Byrya ntamuswa ubaho ahubwo habura uburyo numuhate. Uyu mwana abere abandi ikitegrerezo kandi azakomeze kujya yibuka ko buriya hari nabandi murungano rwe, nabo bari abahanga ariko ntibabone amahigwe yo kugeragezwa ngo nabo berekane indi sura abandi bababa batababonamo. Congratulations kandi wamugani the sky is the limit…keep it up
Ni byiza gushiraho umwete mu bintu byafasha mu buzima busanzwe bwa muntu ariko twibike ko tugomba gushyiraho uwundi mwete mwinshi dushaka n’Imana kuko tuzahembwa byinshi harimwo n’ubizima buhoraho.Dushake Uwiteka bigishoboka
Iyi ni inkuru nziza yubaka urubyiruko by’umwihariko
Hari n’ukora examen arwaye agatsindwa ngo ni umuswa. Na Einshtein bamwitaga umuswa! Hari n’igihe uvuga ibirenze ubwenge bw’abakwigisha ukitwa umuswa.
Nanjye mfite mushiki wanjye twasigaranye, muri secondaire nahoraga mutuka nti koko niki cyagusigaje kuki utagira umuhate ngo utsinde.
ubu aho yiga muri kaminuza, ntungurwa nuko ambwira ati nimutse nta session.
Umuhate no kwiyizera ukongeraho kwiha intego, ibintu byose urabitsinda kandi ukagera kuntego.
Congs sister
Uyu mukobwa rwose akwiriye igihembo cy’agaciro! Bitewe nuko yitwaye akwiriye no kuba umuyobozi akajya atera abandi courage! ibi bigaragaza ko abakobwa nabo bafite ijambo
Kubona amanota biterwa n’ingufu wakoresheje wiga kandi ukirinda kuvuga ngo iri somo rirakomeye sinarishobora.
Uyu mukobwa njyewe nshaka kumutora muri 2017.
Uyu Mukobwa rwose RTUC Yari Ikwiriye no kumuha amahirwe yo kwiga “Masters” bamurihira.
nubundi gushaka niko gushobora.nange sinari nabonye bourse ariko ngize amahirwe mbona umuterankunga andihira kaminuza ndangiza mubambere kdi abo twiganaga banyitaga wawundi utarize trocomme kdi sinari nazize kutita kumasomo cy ngo ndangare ahubwo byatewe nuko nize superieur kukigo kibi aho wasangaga abanyeshuli bagura amanotana ba prof bityo tugacika intege zo kwiga kuko nubundi warigaga utatanga amafaranga bakaguha echeck yewe ntawarubara burya icyo uzabacyo kiragutegereza.courage sister icyo ushaka kubacyo cyose uzakigeraho.Ntawe bitabera.
Félicitations MUNYANA, byose birashoboka, nawe byakubera. Komereza aho rata maze wirebere ukuntu Yesu arera Imfubyi neza. Ndakwishimiye cyane.Amateka arahinduka, Imana igahindurira umuntu izina.Komereza aho. God be with You!
Amanota muri za Kaminuza so mu Rwanda cyane cyane izigenga ntaho ahuriye n’ubumenyi. Nibenshi babonye grande diatinction ariko mu kazi umusaruro ukabura.
RTUC yo n’utarize arayiyitirira. YOUNG GRACE… iyo afira indi yiyitirira ngo urebe…
Uwo mukobwa rero Abe aretse kumera amababa. Isoko ry’umurimo rizamwerekana. Gusa twibuke ko abakobwa benshi bugarijwe n’uburangare ndengakamere, uburaya n’ubwomanzi…
WOWE URETSE ISHYARI NTAKINDI KIKUZUYE, IMANA I GUHINDURA IGUKUREMO ISHYARI, LETA YAYEMEYE KUKO ISHOBOYE, YOUNG GRACE YAYIYITIRIYE KUKO YAHIZE UMWAKA YUMVAGA ABAMUBONYE AKIHIGA BARIBUBYEMERE, KUBERA ARI KAMINUZA IRI UPDATE IRAMUTAMAZA, BANGAHE SE BIYITITIRA KIST NA UR BATARANAHAKANDAGIYE NTIBAVUMBURWE , GABANYA ISHYARI UNIVERSITY ZOSE URWANDA RWEMEYE KO ZIKORA NUKO ZISHOBOYE
Penina ni umuhanga kandi n’umunyabushake, akarangwa n’umurava no gushyira hamwe. Ni ubwo bamwe bamwise “Umuswa”, siko namubonye. Twariganye muri RTUC mvuye muri IPRC kandi nari nabaye uwa mbere muri Secondaire ndetse nanabaye uwambere aho nigaga ubwo twakoraga Tronc Commun. Ariko kuba atarabonye bourse ya leta sibyo byamugira umuswa ahubwo kuba ataracitse intege binyigishije byinshi. Byanze bikunze, ube umuswa cyangwa umuhanga isi yose yemera, umunsi umwe nawe uzatsindwa cyangwa wigeze gutsinda. Ikibi ni ugucika intege! Conglatulation to you MUNYANA, Wish you all the best!
Congratulations Penine!! I am very sure with your commitment will help you to reach far!! keep it up
God Loves you!!
congulatularation , nukuri uri intwari kandi komeza ube intwari. jye twariganye nta byinshi nakuvugaho gusa nemera ko uri umuhanga kandi ukaba n’ inyangamugayo. gukomeza kwiga byo utize se ubwo mu Rwanda twaba tubara!
Nzeyimana we uransebeje ntubuze byose koko! mbega mbega! ngo “congulatulations?” nta nkoranyamagambo (dictionary) ugira ngo niba utazi uko ijambo ryandikwa ubanze urebekoko?
Congratulation Penine, umuhate uhorana uzakugeza kuri byinshi kd nukuri nibyo tukwifurije kd ibi nkuko wabivuze bige bibera urundi rubyiruko isomo ry’uko rutagomba gucika intege kubera ko dufite leta nziza iharanira ko urubyiruko rwakomeza gutera intambwe igana imbere, courage Munyana.
RTUC sinayizemo,ariko benshi bazi abahize babashinja ubuswa kumurimo.uwamugeza muri UR-CST(former KIST) agashungo kashira kuko n’abo bahohereza bafite aho 100% ntawuragira 95% kdi biga ijoro n’amanywa.Gusa Courage Kuri Uyu Mwana,ahari we ubushomeri buri hanze aha ntazahura nabwo.
felicitation umuhate wawe ntabwo ari uwubusa ,turagusengera cyane kandi IMANA izabigufasha .KOMEREZAHO TUKURI INYUMA KUKO NIYO IHINDURA AN
AMATEKA.
Muzabaze ibyo uyumukobwa yakoreye aho yigaga TC , i cyangugu mucyigo cya Gishoma, mwese mwahita muhindukira mukamukubita, imana imufashe.
ahubwo se Penina kuki yavuze ngo imfubyi ya Jenoside? ntafite se wumukire i Gatanga ra?hahaha yewe!
Amakosa yaba yarakize yose I Gishoma uko yaba angana kose naho yatukura tukutuku ntacyo bavuze, igikuru yarahindutse akora neza.Ibindi ni amateka
Komera Bobo we, amateka ni meza da , atuma umenya aho ukandagira ntabwo wayirengagiza nayo, komera cyanee muvandimwe Bobo
Good! Birakwiye rwose nanjye nakubonyemo umuhate idasanzwe. Courage imbere ni heza
Munyana ntabwo nkuzi ariko nshimye kubwakazi keza wakoze Imana ikomeze ikuyobore kandi uwomuhate uzakomeze ukurange kuko uracyafite byinshi byogukora imbere.
Munyana ni umugeni mwiza pe….
Ibi bibaho, nize mu i Semeinari ndangiza uwa 6 nza muri bane ba nyuma. Muri Classe abanyeshuri bose nabarusha mu isomo rimwe, ariko kubera kubura guidance amasomo amwe nkayihorera sinyige cyane nkayatsindira ku mwamba 50, 51 cg 52%; hakubitiraho ubupfubyi kubura minerval, banyirukanira minerval buri gihe nkatsindwa kabisa, nabuze uwo nabwira ikibazo cyanjye, byose nkabyibikaho, nkurana umubabaro ku mutima dore ko nta n’umuntu nagira wo kwereka bulletin. Turangije Secondaire, naje kubona bourse nkomereza muri mi ishami rimwe rya Kaminu y’u Rwanda, mbona byose birahindutse, kubera kumenyera ubuzima bubi, Rwf 25,000 baduhaga yambereye menshicyane, njye narasaguraga. naje kwiga kandi ibijyanye na rya somo nakundaga. Narabitsinze karahava abanyeshuri twiganaga bose bari baremeye, ubu inzego nyinshi zimpa ibiraka kubera ubunararibonye mfite muri uwo mwuga. Burya gutsindwa biterwa n’ibintu byinshi, umuntu yakabanje kureba ibindi bitera umuntu gutsindwa (external factors) mbere y’ uko yita undi umuswa, dore ko hari n’igihe usanga uba wiga amasomo atagufasha na busa. Ubu nkorera abandi, mfite na Company ndikorera ubuzima bumeze neza.Kdi sinzahwema na rimwe kubwira abantu ko ibibazo, aho uri(environment), kubura ubufasha (guidence), ubukene, kwiga ibyo udakunda cg udashoboye, kwigishwa n’abarimu bagendana n’abahanga gusa (elitism) bishobora kukugira umuswa utari we, ugahura n’ikibazo nk’icya Munyana
Mwiriwe, ndabashimira mwese mwagize comments mushyiraho, zaba nziza cyangwa se izitari nziza cyane. ..ndabizi ko umuntu aba agizwe n’amateka ameza n’amabi biturutse ku kuko ariko umuntu aremye, hari abo twabanye ngaragara nkaho ndi mwiza kuribo hari nabo twabanye ngaragara nabi bitewe n’ubwana se cyangwa nama situation runaka twarimo . Gusa nemera ko igihugu turimo kidufasha kureba imbere kurusha guheranwa n’amateka akaba ariyo tubamo ibihe byose. A bavuze bati “yari mubi kera” be kubyubakiraho kuko ntacyo Imana itahindura mu muntu kandi ni bihe byiza iyo bije birahindura. Abambwiye courage niko ko mwakoze cyane kuko muri inyungu ku buzima bwanjye namwe ubwanyu, ndabashimira ubufasha bwose mwampaye n’inama nziza mwangiriye nanjye ndizera ko hamwe no gusenga no gukora Imana izakomeza kunyobora.abakomeje kwiga nkanjye mukomere kandi mushyiremo imbaraga kuko ikintu cyose umuntu yifuzaga akigeraho bidaturutse kuri kaminuza yizeho kuko akenshi usanga n’abarimu bigisha aho bitako hakomeye ninabo natwe batwigisha, abatarabonye amahirwe yo gukomeza namwe Imana ifite ukundi izigaragaza muhumure, kandi ababishoboye nabo bagerageze dufatanye twubake ejo heza ku gihugu cyatubyaye ndetse no ku isoko ryo hanze yacyo.murakoze
Comments are closed.