Paul Okoye wa P-Square yabyaye umuhungu

Paul Okoye we mu bagize itsinda ry’impanga P-Square ryo muri Nigeria, yibarutse umwana w’umuhungu kuri uyu wa 11 Mata 2013.

Uyu muhanzi abyaye nyuma y’amezi atatu gusa impanga ye Peter Okoye nawe n’umukunzu we Lola bibarirutse.

Aba basore bagize iri tsinda baherutse mu Rwanda kuya 14 Ukuboza 2012 aho bashimishije abanyarwanda benshi mu gitaramo bakoreye kuri stade Amahoro kikanitabirwa na Perezida Kagame.

Abicishije kuri Twitter, Peter (impanga ya Paul) yagaragaje ifoto ya mugenzi we ateruye umwana yibarutse ndetse aha ikaze uwo mwana wiswe Andre.

P-Square ni itsinda ry’abasore b’imyaka 31 b’impanga, rimaze kwamamara cyane muri Africa kuva mu mwaka wa 2007 nubwo batangiye iri tsinda mu 1999 ubwo bigaga muri Kaminuza ya Abuja mu ishami rya Business Administration.

Ubu bazwi cyane mu ndirimbo zakunzwe nka Game Over, Danger, E No Easy, Chop My Money na Alingo basohoye mu mpera z’umwaka ushize.

Nzeyimana Luckman
UM– USEKE.COM