Oscar Pistorious yagizwe umwere ku cyaha cyo kwica Reeva ABIGAMBIRIYE

Update: Oscar Pistorious wamamaye kubera gusiganwa ku maguru mu mikino y’abafite ubumuga, kuri uyu wa gatanu tariki 12 Nzeri yahamijwe icyaha cyo kwica umukunzi we Reeva, nyuma y’aho kuwa kane yari yagizwe umwere ku cyaha cyo kwica Reeva abigambiriye.

Kuwa kane tariki ya 11 Nzeri 2014 – Urubanza rwasomwe n’umucamanzakazi Thokosile Masipa uzwi cyane muri Africa y’Epfo nk’umwiraburakazi wabaye umucamanza wa kabiri muri iki gihugu ni we wasomye urubanza.

Oscar Pistorious n’abo mu muryango we, barimo na murumuna we wicaye mu kagare wavunitse amaguru mu mpanuka, abo mu muryango w’umukobwa yishe witwa Reeva ndetse n’abantu benshi bari mu rukiko bakurikirana isomwa. Abandi bantu benshi ku Isi nabo bakurikiraga amakuru ku isomwa ry’uru rubanza rwatangiye kuburanishwa mu kwa gatatu uyu mwaka.

Pistorious wacitse amaguru yombi akaba icyamamare mu gusiganwa ku maguru mu bamugaye kuko nko mu mikino Paralympic iheruka yatwaye imidari ibiri ya zahabu n’umwe w’umuringa, ashinjwa kwica abigambiriye uwari umukobwa w’inshuti ye Reeva Steenkamp hari tariki 14/02/2013. Urukiko rwanzuye uyu munsi ko Pistorious ari umwere ku cyaha aregwa cyo kwica umukobwa wari inshuti ye abigambiriye.

Umucamanza Thokosile Masipa yafashe umwanya ugera ku masaha ane ndetse hanacamo ikiruhuko asoma buri kantu imyanzuro y’urukiko yagendeyeho mu iburanisha ryatangiye mu kwezi kwa gatatu 2014.

Yavuze ko ubwo yicaga Reeva nta muhamya wabyo wabibonye n’amaso wari uhari, ko abatangabuhamya 33 bumviswe mu rukiko buri wese yavugaga ku byo yumbise cyangwa ibyo acyeka ko yumvise ku munsi ubwicanyi bubaho.

Mu iburanisha humvikanye ko abatangabuhamya bamwe bavuga ko bumvise amasasu abandi bakavuga ko bumvise urusaku rw’ikibando (bat) bakinisha umukino wa ‘cricket’. Abatanze ubuhamya kandi bose ntibahuriza ku mubare w’amasasu bumvise aturika, bamwe bavuga atatu, abandi ane abandi rimwe…

Umucamanza yavuze ko mu byo bumvise mu rubanza bidashobora gutuma babishingiraho cyane ariko nanone bize buri buhamya bw’umwe wese bakabuha agaciro kabwo.

Icyo bigagaho ni ukwanzura niba uyu mukinnyi mu gusiganwa mu bamugaye yarishe uyu mukobwa abishaka kuko we avuga ko yamurashe yikanze abajura.

Urukiko rugendeye ku mpamvu zitandukanye zirimo ibyabaye mbere yo kumurasa, kuba yari afite intwaro n’amasasu hafi ye, kurasa akikanga nk’uko abivuga n’izindi ngingo nyinshi zasobanuwe n’uyu mucamanza, urukiko rwafashe umwanzuro ko Oscar Pistorious atishe Reeva abigambiriye.

Oscar Pistorious amaze gusomerwa ko ari umwere ku cyaha cyo kwica umukunzi we abigambiriye, yaturitse ararira ariko ntibyarangiye kuko indi myanzuro y’urukiko izasomwa ku munsi w’ejo kuwa gatanu.

Kuri uyu wa gatanu Pistorious akaba yahamijwe icyaha cyo kwica atabisha uwari umukunzi we, iki cyaha muri Africa y’epfo ntigikomeye nk’uko bafata icyo kwica umuntu ubugambiriye.

Iki cyaha yahamijwe gishobora kuzamuviramo gufungwa imyaka 15 cyangwa kigasubikwa, kimwe n’uko yasabwa gutanga ingurane y’amafaranga.

UM– USEKE.RW