"Nzagerageza kwitwara neza mu gihe nkiri Miss Rwanda"- Miss Akiwacu

Ubwo kuwa gatandatu w’iki cyumweru dusoje, Miss Rwanda Akiwacu Colombe yasuraga Centre Marembo icumbikiye bamwe mu bana b’imfubyi akaba yari yabageneye inkunga y’ibiribwa, umwe mu bana yamubajije niba atazitwara nabi ngo bamutere inda, Miss avuga ko azagerageza kwitwara neza mu gihe cyose akiri Miss Rwanda.

Uyu mwana nyuma yo gusobanurirwa ibijyanye no kugira intego mu buzima, dore ko ariyo ngingo Miss yari yateguye kuganiriza kuri abo bana, yaje guhabwa umwanya ngo agire ikibazo yabaza Miss ku byo yari amaze kubabwira.

Mu kibazo cye, yabajije Miss niba azagera ku ntego ze atarashaka umugabo nk’uko hari bamwe muri ba nyampinga b’u Rwanda bagiye bagaragaza kutitwara neza nyuma yo kwambikwa ikamba nk’abakobwa bahize abandi.

Akiwacu Colombe yaje kumusubiza ko azagerageza guhesha agaciro, izina rye n’icyizere yagiriwe n’Abanyarwanda.

Yagize ati “Ndacyari muto sindatekereza ibyo gushaka umugabo, ariko nta nubwo nzitwara nabi ngo mbe nabyarira mu rugo, umwana w’ikinyendaro. Izina ryanjye rya Miss nzarigumana ndiheshe agaciro. Niyo hashira imyaka 1 000 ntibizakuraho ko nabaye Miss Rwanda 2014.”

Undi mwana yaje kubaza Miss Akiwacu niba yumva yaravutse agakura azi ko azaba Miss, nk’uko yari yasabye abajene kumenya mbere abo bazaba bo maze bakabiharanira.

Akiwacu, benshi batari bazi icyari indoto ze mu bwana bwe, yamusubije ko mu buto bwe yumvaga azaba umuntu wamamaza imideli wo ku rwego rwo hejuru ku isi.

Gusa ngo nyuma yaje kujya mu irushanwa ry’aba Miss aratsinda bityo ngo bizamufasha kugera ku ntego yari yariyemeje akiri muto kuko yatangiye kumenyekana.

Yagize ati “Nakuze numva ko nzaba Top model, ubu ndi mu nzira yo kuba uwo niyemeje kuba, kandi kuba narabaye Miss bizanyorohera.”

HATANGIMANA Ange Eric
ububiko.umusekehost.com