Nyuma y’imyaka 2 badakina, Amavubi y’abagore ngo arashaka kuvana CECAFA muri Uganda

Ikipe y’igihugu Amavubi y’abagore iri mu myitozo yitegura CECAFA y’abagore izaba hagati ya tariki 11 na 20 Nzeri 2016, i Jinja muri Uganda intego ngo ni ukuyegukana. Iyi kipe ariko yari imaze imyaka ibiri nta mikino ikina.

Abakobwa 26 bataniye umwiherero n’imyitozo iyobowe n’umutoza umenyerewe mu mupira w’amaguru w’abagore, Grace Nyinawumuntu, wungirijwe na Sosthene Habimana usanzwe ari umutoza wa Musanze FC, naho umutoza w’abanyezamu ni Maniraguha Jean Claude wa Police FC.

Iyi kipe iri kumwe na Tanzania na Ethiopia mu itsinda B, ngo ifite intego zo kwegukana CECAFA nk’uko Grace Nyinawumuntu ubatoza yabibwiye Umuseke.

“Tumaze imyaka ibiri tudakina, birashoboka ko kumenyerana bitahita biza neza, biranashoboka ko abo tuzahangana baturusha inararibonye kuko nubwo twabatsindaga muri 2014, twari twarahagaze tudakina, ariko bo bakomeza kwitabira amarushanwa.

Gusa njye n’abakobwa banjye tuzajyana intego yo kwereka abatuyobora ko tutari ikipe idatanga umusaruro nkuko bivugwa, ko natwe dushobora kwitwara neza imbere y’amahanga tugahesha igihugu cyacu ishema, kandi trashaka gutwara iyi CECAFA ngo bose babone ko dushoboye natwe.” – Grace Nyinawumuntu

Amavubi y’abagore aheruka gukina tariki 8 Kamena 2014, ubwo banyagirwaga ibitego 8-0 n’ikipe y’igihugu ya Nigeria, mu mikino yo gushaka itike y’igikombe cya Africa.

Nyuma y’uyu mukino, Ministeri y’imikino yasabye ko iyi kipe y’igihugu yakurwaho, bagategura abana bazatanga umusaruro. Nyuma y’imyaka ibiri iyi kipe iragarutse, kandi ngo intego bajyenye muri CECAFA ngo ni ukwerekana ko nabo bashoboye.

Aya marushanwa azabera kuri stade ya Jinja muri Uganda azatangira ku cyumweru tariki 11 Nzeri, ariko Amavubi agakina umukino wa mbere na Tanzania kuwa mbere tariki 12 Nzeri 2016, bazahaguruka kuwa gatandatu tariki 10 Nzeri.

Abakinnyi 26 bagomba gutoranywamo 20 bazajya i Kampala ni;

Abanyezamu: Ingabire N. Judith (AS Kaigali), Nyinawumuntu Shamimu (Kamonyi Fc) and Uwizeyimana Helene (AS Kigali)

Ba Myugariro: Mukamana Clementine (AS Kigali), Maniraguha Louise (Les Lionnes), Umulisa Edith (AS Kigali), Mukantaganira Joseline (Kamonyi), Kayitesi Alodie (AS Kigali), Uwamahoro M. Claire (AS Kigali), Abimana Djamila (Kamonyi) and Nyiransanzabera Miliam (AS Kigali)

Abo hagati: Nibagwire Sifa Gloria (AS Kigali), Mukashema Albertine (Kamonyi,) Nyirahafashimana M. Jeanne (AS Kigali), Mukeshimana Janette (Kamonyi), Mwizerwa Francine (AS Kigali), Mukeshimana Dorothea (Kamonyi), Umwariwase Dudja (AS Kigali), Ntagisanimana Saida (AS Kigali), Uwamahirwe Chadia (AS Kigali) and Kalimba Alice (AS Kigali).

Ba Rutahizamu: Ibangarye Anne Marie (AS Kigali), Iradukunda Calixte (Kamonyi), Nibagwire Liberate (AS Kigali), Uwihirwe Kevine (Rambura) and Imanizabayo Florence (AS Kigali).

Abatoza : Head Coach Grace Nyinawumuntu, Sosthen Habimana (Assistant coach), Maniraguha Jean Claude (Goalkeepers’ coach)

Photo © R.Ngabo/Umuseke

Roben NGABO
UM– USEKE.RW