Nyamasheke: Abarokotse Jenoside batuye mu mudugudu barataka imibereho mibi

Umudugudu wa Kabuyekera uri mu kagali ka Mubumbano mu murenge wa Kagano byo mu karere ka Nyamasheke bamaze imyaka itandatu batujwe muri uyu mudugudu, ariko inzu zabo zimwe zarangiritse cyane kuko zubatswe zisondetswe. Aba baravuga ko kandi bugarijwe n’ubukene kuko inkunga y’ingoboka bagenerwaga yahagaze.

Umukobwa w’imyaka 28 utuye muri uyu mudugudu yeretse Umuseke uburyo inzu batuyemo yashaje kuko yubatswe nabi, igice cyo hasi cyarangiritse bikomeye n’igikoni cyarasenyutse.

Ati “Nk’iyi nzu nyibanamo n’abavandimwe banjye babiri twasigaranye turi impfubyi zibana, twubakiwe izi nzu ariko reba nyuma y’igihe gito zimeze kandi nta bushobozi dufite bwo kwisanira.”

Undi baturanye witwa Esperance ati “N’amafaranga ibihumbi 40 y’ingoboka baduhaga mu mezi atanu ubu barayahagaritse, Leta nidutabare abatuye muri uyu mudugudu wacu.”

Claudette Mukamana umuyobozi w’Akarere wungirije ushinzwe imibereho myiza y’abaturage yabwiye Umuseke ko hari gahunda zinyuranye zo gufasha aba batuye muri uyu mudugudu kimwe n’abandi batishoboye kurusha abandi.

Mukamana ati “Tuzabafasha kimwe n’abandi, kuba amafaranga y’ingoboka yabo yarahagaze twabikoreye ubuvugizi kandi FARG irabizi, tuzaboroza inka muri gahunda ya Girinka na VUP bizatuma bikura mu bukene kuburyo n’iyi ngoboka ihagaze bakomeza kwibeshaho, turabatekereza kandi tubari hafi.”

Abatuye muri uyu mudugudu kandi bavuga ko bafite ikibazo cy’abana babyaye nyuma ya Jenoside ubu batari kwiga kuko nta bushobozi bafite kandi bakaba badashobora kurihirwa na FARG.

Ubushakashatsi (survey) ku buzima n’imibereho by’abanyarwanda bwamuritswe n’ikigo cy’igihugu cy’ibarurishamibare mu mwaka ushize bwerekanye Akarere ka Nyamasheke ariko kari inyuma mu hari ubukene buri kuri 62% naho ubukene bukabije buri kuri 39,2%.

Francois Nelson NIYIBIZI
UM– USEKE.RW/Nyamasheke